Ստեփանավանի նախկին ղեկավարի որդու նկատմամբ հանրային քրեական հետապնդում է հարուցվել
Լոռու մարզի Ստեփանավան համայնքի նախկին ղեկավարի որդին՝ Ա.Ղ.-ն, հանցավոր ճանապարհով ձեռք բերված գույքի հանցավոր ծագման աղբյուրը, պատկանելիությունը, տնօրինման եղանակը թաքցնելու և խեղաթյուրելու, հանցավոր գործունեության արդյունքում ստացված անշարժ գույքն օրինականացնելու նպատակով, ձեռք է բերել իր հոր՝ Ս.Ղ.-ի հանցավոր գործունեության հետևանքով ստացված, Հողային օրենսգրքի 60-րդ հոդվածով նախատեսված սահմանափակումների ցանկում ներառված (օտարման ոչ ենթակա հողեր), քաղաքացիներին և իրավաբանական անձանց սեփականության իրավունքով փոխանցման ոչ ենթակա ընդհանուր օգտագործման կանաչապատ տարածքը:
Ինչպես տեղեկանում ենք Գլխավոր դատախազության տարածած հաղորդագրությունից, 2023 թվականի հունիսի 27-ին դատախազն իր նախաձեռնությամբ որոշում է կայացրել Ա.Ղ.-ի նկատմամբ հանրային քրեական հետապնդում հարուցելու մասի:
Որոշումը նույն օրն ուղարկվել է նախաքննական մարմին՝ Ա.Ղ.-ին մեղադրանք ներկայացնելու համար:
Նախաքննական մարմնի կողմից 2023 թվականի հունիսի 27-ին որոշում է կայացվել ազատության մեջ գտնվող մեղադրյալին դատարան ներկայացնելու նպատակով ձերբակալելու մասին:
Ծանուցում. հանցագործության համար մեղադրվողը համարվում է անմեղ, քանի դեռ նրա մեղավորությունն ապացուցված չէ քրեական դատավարության օրենսգրքով սահմանված կարգով` դատարանի` օրինական ուժի մեջ մտած դատավճռով:
