Բելգորոդի մոտ գծերից բեռնատար վագոնների դուրս գալու պատճառով դադարեցվել է գնացքների երթևեկությունը
Բելգորոդի մարզի ղեկավար Վյաչեսլավ Գլադկովը տեղեկացրել է երկաթուղային հաղորդակցության դադարեցման մասին, քանի որ նախօրեի երեկոյան Ալեքսեևյան քաղաքային օկրուգում բեռնատար վագոնները դուրս են եկել գծերից, տեղեկացրել է «Ինտերֆաքսը»։
«Արտակարգ պատահարի պատճառով կանգնեցվել է էլեկտրագնացքների և մերձքաղաքային գնացքների երթևեկությունը։ Հույս ունեմ, որ երկաթուղին արագ կլուծի իրավիճակը և երկաթուղային հաղորդակցությունը կվերականգնվի»,- կիրակի գրել է նա իր Թելեգրամ-ալիքում։
Նա նշել է, որ երկաթուղու աշխատակիցները և բնակիչները չեն տուժել։
Հարավարևելյան երկաթուղու մամուլի ծառայության տվյալներով՝ լոկոմոտիվը և բեռնատար վագոնները դուրս են եկել գծերից հունիսի 10-ին, ժամը 21.47-ին Բելգորոդի մարզի Խլյովիշչե-Բիրյուչ ուղեմասում։
Լիսկի, Վալույկա, և Ստարի Օսկոլ կայարաններից դեպքի վայր են ուղարկվել վերականգնող գնացքներ։
