Բայդենն առաջարկել է խաղաղության դիմաց Ուկրաինայի տարածքի մոտ 20%-ը տալ ՌԴ-ին. Neue Zürcher

ԱՄՆ Կենտրոնական հետախուզական վարչության ղեկավար Ուիլյամ Բերնսը հունվարի կեսերին խաղաղության ծրագիր է առաջարկել Կիևին և Մոսկվային: Ինչպես գրում է kommersant.ru-ն, նման հայտարարությամբ է հանգես եկել Neue Zürcher Zeitung (NZZ) թերթը։

ԱՄՆ նախագահ Ջո Բայդենը, ըստ NZZ-ի, Բերնսիին ուղարկել է Կիև և Մոսկվա՝ խաղաղության դիմաց Ուկրաինայի տարածքի մոտ 20%-ը ռուսական կողմին փոխանցելու առաջարկով։ Հրատարակության տվյալներով՝ երկու կողմերն էլ հրաժարվել են նման առաջարկից։

Հաղորդվում է, որ այս կերպ Բայդենը ցանկացել է խուսափել Ուկրաինայում տևական պատերազմից։ NZZ-ը նաև նշել է, որ միայն այն բանից հետո, երբ Բերնսը ձախողել է այս ծրագիրը, ամերիկացի առաջնորդը որոշել է Abraams տանկեր մատակարարել Կիևին։

Ավելի վաղ հաղորդվել էր, որ հունվարին Բերնսն իբր գաղտնի այցելել է Մոսկվա։ The Washington Post-ը նախկինում գրել է, որ հունվարի կեսերին ԿՀՎ ղեկավարը Կիևում գաղտնի հանդիպել է նաև Ուկրաինայի նախագահ Վլադիմիր Զելենսկու հետ։

Ըստ NZZ-ի՝ ուկրաինական իշխանությունները չեն ցանկանում իրենց տարածքի բաժանումը, իսկ Ռուսաստանի իշխանությունները վստահ են, որ «ամեն դեպքում, երկարաժամկետ հեռանկարում նրանք կհաղթեն պատերազմում»։

Սակայն ԿՀՎ-ի անանուն պաշտոնյան Newsweek-ին ասել է, որ NZZ-ի պնդումները «լիովին կեղծ են»: ԱՄՆ Ազգային անվտանգության խորհրդի խոսնակ Շոն Դավեթը հրապարակմանը ասել է, որ NZZ-ի հրապարակումը «ճշգրիտ չէ»։ Ռուսաստանի և Ուկրաինայի պաշտոնյաները դեռ չեն մեկնաբանել այս տեղեկությունը։

Պաշտոնապես Ռուսաստանի և Ուկրաինայի միջև խաղաղության բանակցությունները դադարեցվել են 2022 թվականի մայիսին՝ Կիևի նախաձեռնությամբ։ 2022 թվականի հոկտեմբերի 4-ին Ուկրաինայի նախագահ Վլադիմիր Զելենսկին հրամանագիր է ստորագրել, որով բացառվում է Ռուսաստանի նախագահի հետ հետագա բանակցությունների հնարավորությունը, քանի դեռ նախագահը Վլադիմիր Պուտինն է։ ՌԴ ԱԳՆ-ն հունվարին հայտարարել էր, որ Ուկրաինայի հետ բանակցությունների նախադրյալներ չեն տեսնում։