Սոչիում Պուտինի հետ հանդիպման ժամանակ Փաշինյանը ներկայացրեց իր ակնկալիքները Ռուսաստանից
Սոչիում մեկնարկել է Վլադիմիր Պուտինի և Նիկոլ Փաշինյանի երկկողմ հանդիպումը։ Այն տեղի է ունենում Սոչիի «Ռուս» առողջարանում, որտեղ ավանդաբար, ինչպես Բոչարով ռուչեյ նստավայրում, Պուտինն ընդունում է արտասահմանցի հյուրերին։
Ռուսաստանի ղեկավարի խոսքով, պետք է վերջ տալ ղարաբաղյան հակամարտությանը։
Ըստ նրա, այժմ ամենակարևորը տարածաշրջանում խաղաղության ու կայունության ապահովումն է, տրանսպորտային ենթակառուցվածքների ապաշրջափակումը։ Վլադիմիր Պուտինը նաև հույս է հայտնել, որ մոտ ապագայում հնարավոր կլինի լուծումներ մշակել, որոնք հնարավորություն կտան առաջ շարժվել այս հարցում։
Իր հերթին, Նիկոլ Փաշինյանը շնորհակալություն է հայտնել Ռուսաստանի Դաշնության նախագահին հանդիպման կազմակերպման համար՝ հաստատելով, որ Ռուսաստանի մոտեցումները ԼՂ հարցում ընդունելի են Երևանի համար։
Նա նշել է, որ այդ առաջարկները չեն հակասում Պրահայում տեղի ունեցած հանդիպման արդյունքներին։
Փաշինյանն ասել է, որ հայկական կողմի համար կարևոր է ռուսական խաղաղապահների պատասխանատվության գոտուց ադրբեջանական ուժերի դուրսբերումը, որոնք ներխուժել են այս տարվա մարտ ամսին։ Նա նշել է, որ ադրբեջանական ուժերը դեռ դուրս չեն եկել ռուսական խաղաղապահների պատասխանատվության գոտուց ԼՂ-ում, և հուսով է, որ այսօրվա քննարկումների արդյունքում այդ հարցը կլուծվի։
Փաշինյանը խոսել է սեպտեմբերի 13-ին ադրբեջանական հարձակման մասին՝ ասելով, որ Ադրբեջանը նոր տարածքներ է օկուպացրել, իսկ հայկական կողմի համար չափազանց կարևոր է ՌԴ հստակ գնահատականն այս հարցում ձևակերպմամբ, որ ադրբեջանական ուժերը պետք է վերադառնան մայիսի 11-ի դիրքերին։
Ավելի ուշ Սոչիում տեղի կունենա եռակողմ գագաթնաժողով, որին կմասնակցեն Նիկոլ Փաշինյանը, Վլադիմիր Պուտինն ու Իլհամ Ալիևը։
Հանդիպման մեկնարկից առաջ Կրեմլի պաշտոնական ներկայացուցիչ Դմիտրի Պեսկովը ոչ հերքել է և ոչ էլ հաստատել Պուտին-Փաշինյան-Ալիև բանակցությունների արդյունքում փաստաթղթի ստորագրման հավանականությունը։
«Եկեք չկանխագուշակենք հանդիպման արդյունքները։ Եթե նման փաստաթուղթ ստորագրվի, լրատվամիջոցները կտեղեկացվեն այդ մասին»,- ՌԻԱ Նովոստի գործակալության փոխանցմամբ՝ նշել է Կրեմլի խոսնակը։
