Հայկական քաղաքային որոնողափրկարարական թիմը վերաորակավորվում է
Սեպտեմբերի 1-ին մեկնարկել է հայկական քաղաքային որոնողափրկարարական (ՔՈՓ) թիմի 36-ժամյա վարժանքը։ ՄԱԿ-ի միջազգային որոնողափրկարարական խորհրդատվական խմբի (INSARAG) 2022 թ. վերաորակավորման գործընթացի շրջանակներում ԱԻՆ փրկարար ծառայության տնօրենի տեղակալ Հովհաննես Եմիշյանը հանդիպում է ունեցել ՄԱԿ-ի վերաորակավորող հանձնաժողովի պատվիրակության և INSARAG-ի քարտուղարության ներկայացուցիչ Մարտին Իվերսի հետ։
Ինչպես հայտնում են ՀՀ արտակարգ իրավիճակների նախարարությունից, հանդիպման ընթացքում ԱԻՆ աշխատակիցների կողմից ներկայացվել է վարժանքի անցկացման պլան-ժամանակացույցը։ Քննարկվել են տեղամասերի, իրականացվող գործողությունների վերաբերյալ մի շարք հարցեր։
ՄԱԿ-ի վերաորակավորող հանձնաժողովի պատվիրակությունն այցելել է նաև Ճգնաժամային կառավարման ազգային կենտրոն, ծանոթացել միջազգային հումանիտար արձագանքման կարգին՝ ազդարարումից մինչև կառավարում։
Ապրիլի 26-27-ն անցկացվել էր INSARAG-ի չափորոշիչներին համապատասխան 36-ժամյա նախնական վերաորակավորման վարժանք, որը Շվեյցարիայի զարգացման և համագործակցության գործակալության պատվիրակության կողմից բարձր գնահատականի էր արժանացել։
Հայկական ՔՈՓ թիմը ՄԱԿ-ի միջազգային որոնողափրկարարական խորհրդատվական խմբի (INSARAG) անդամ է 2015 թվականից։
