ԱՄՆ-ի կառավարությունը հայտարարել է ուսանողական վարկերի 10.000-ից մինչև 20.000 դոլարի ներման մասին
ԱՄՆ-ի նախագահ Ջո Բայդենն ասել է, որ կառավարությունը 10․000 դոլարի չափով ուսանողական վարկեր կների քոլեջներին պարտքեր ունեցող մեծաթիվ շրջանավարտների համար: Քայլ, որը կարող է մեծացնել Կոնգրեսի նոյեմբերյան միջանկյալ ընտրություններում իր կուսակից դեմոկրատների նկատմամբ աջակցությունը: Այս մասին հաղորդում է «Ռոյթերսը»։
Պարտքի չեղարկումը հարյուր միլիարդավոր դոլարներ կարող է ուղղել դեպի նոր սպառողական ծախսեր: Դրա արդյունքում կավելանա բնակարանների առուվաճառքը:
Շատ դեմոկրատներ պահանջել էին, որ Բայդենը ների մինչև 50․000 դոլար յուրաքանչյուր վարկառուի համար, բայց ողջունում են նրա այս քայլը:
Նոյեմբերին Կոնգրեսում մեծամասնություն կազմելու նպատակ ունեցող հանրապետականները դեմ են այդ քայլին` պնդելով, որ դա անարդար է, քանի որ այն անհամաչափորեն կօգնի ավելի բարձր եկամուտներ ունեցող մարդկանց:
ԱՄՆ-ի սպառողները կրում են հսկայական 1,75 տրիլիոն դոլար ուսանողական վարկի պարտք, որի մեծ մասը պատկանում է դաշնային կառավարությանը, ինչը հարուստ այլ երկրների համեմատ ԱՄՆ-ում ուսանողական բարձր վարձի արդյունք է:
Կառավարությունը նաև ներում է ֆինանսական կարիքներ ունեցող շրջանավարտների մինչև 20․000 դոլարի պարտքը: Այսօր Pell Grant անվանումը կրող ծրագրի ներքո ավարտած անձինք կազմում են 6 միլիոն: Այս մասին հայտնում է կրթության նախարարությունը։
Յուրաքանչյուր ուսանողի համար 10․000 դոլար դաշնային պարտքի կրճատումը կկազմի 321 միլիարդ դոլար դաշնային ուսանողական վարկ և կվերացնի 11,8 միլիոն վարկառուի կամ նրանց 31%-ի ողջ պարտքը:
