Ֆլորիդայում 12-հարկանի բնակելի շենքի փլվելու հետևանքով զոհերի թիվը հասել է ինի
ԱՄՆ-ի Ֆլորիդայի նահանգի Սյորֆսայդ քաղաքի 12-հարկանի բնակելի շենքի փլվելու հետեւանքով զոհերի թիվն ավելացել է՝ հասնելով ինը մարդու: Այդ մասին հայտնել է Մայամի Դեյդ օկրուգի ղեկավար Դանիելա Լեւին Քավան, հաղորդել է CNN-ը։ Նրա խոսքով՝ մեկ մարդ մահացել է հոսպիտալում, եւս ութը մահացած հայտնաբերվել են շենքի ավերակների տակ: Ներկա դրությամբ ճանաչվել է չորս զոհված:
Մայամի Դեյդ օկրուգի ղեկավարը խոստացել է, որ անհայտ կորածների եւ զոհվածների ընտանիքներին թույլ կտան այցելել ողբերգության վայր: Լեւին Քավան նաեւ հայտարարել է, որ արտակարգ ծառայությունների աշխատակիցներին հաջողվել է «հսկողության տակ» վերցնել հրդեհը, որը նախօրյակին դժվարացրել էր փլվածքների տակ գտնվող մարդկանց որոնումները: Ներկայում անհայտ կորած է համարվում շուրջ 150 մարդ: Ավելի վաղ Լեւին Քավան CBS News-ին հայտարարել է, որ արտակարգ ծառայությունների աշխատակիցներն աշխատանքը շարունակում են որոնողա-փրկարարական գործողության ռեժիմով, այսինքն՝ առաջվա պես հույս ունեն գտնել ավերակների տակ ողջ մնացած մարդկանց:
12-հարկանի բազմաբնակարան բնակելի շենքը փլվել էր հունիսի 24-ին՝ Ֆլորիդայի նահանգի ոչ մեծ Սյորֆսայդ քաղաքում: Դրա հետեւանքով փլատակների ներքո է հայտնվել շուրջ 160 մարդ: Փլվելուց հետո հայտնի է դարձել, որ 2018 թվականին կատարված ստուգումները ցույց էին տվել շենքի «լուրջ կառուցվածքային վնասվածքները»: Փլվելու պահին սկսվել էր տանիքի վերանորոգումը, հաղորդել է «Ինտերֆաքս»-ը:
