Ամերիկացին 3 շաբաթ ման է եկել ամենուր՝ չիմանալով, որ իր դրամապանակում 1 միլիոն դոլար կա
Ամերիկյան Հյուսիսային Կարոլինա նահանգի Քոթս քաղաքի բնակիչը 3 շաբաթ ման է եկել ամենուր՝ առանց իմանալու դրամապանակում առկա 1 միլիոն դոլարի մասին: Այս մասին գրում է lenta.ru կայքը` հղում տալով UPI գործակալությանը:
Ֆրեդերիկ Ռասել Քերոլը բենզալցակայանում վիճակախաղի տոմս էր գնել:
«Բոլորի նման՝ ես նույնպես հույս ունեի ինչ-որ բան շահել: Ես ու որդիս որոշեցինք փորձել մեր բախտը և տոմս գնել»,-ասել է նա:
Գնումից հետո տղամարդը տոմսը դրել է դրամապանակի մեջ և մոռացել դրա մասին:
Խաղարկությունից երեք շաբաթ անց Քերոլը վերջապես ստուգել է տոմսը և իմացել, որ անհրաժեշտ է այցելել վիճակախաղի գրասենյակ: Նա չգիտեր, որ շահել է մեկ միլիոն դոլար, մինչև մրցանակի հետևից գնալը:
«Ես ամենուր զբոսնում էի 1 միլիոն դոլարը դրամապանակիս մեջ դրած և նույնիսկ չգիտեի այդ մասին» -զարմացել է Քերոլը:
Տղամարդը նախատեսում է շահումը ծախսել կնոջ բուժման վրա: Մնացած գումարը կիսելու է ընտանիքի հետ:
