Հնդկաստանում Գանգա գետից դուրս են բերել COVID-19-ից մահացածների վեց մարմին
Մայիսի 31-ի երեկոյան վեց մարդու մարմին են դուրս բերել հնդկական Ութար-Փրադեշի նահանգում Գանգա գետից: Այդ մասին India TV հեռուստաալիքին հայտնել է տեղի իշխանությունների ներկայացուցիչը։
«Գետից դուրս են բերել քայքայված վեց մարմին: Բժիշկների թիմը դիակիզարանում վերջին գործողություններն է անցկացրել COVID-19-ով վարակված մարդկանց մարմինների հետ վարվելու սկզբունքներին համապատասխան»,-հեռուստաալիքի եթերում հայտնել է տեղի պաշտոնյա Փրամոդ Ջան:
Նա հիշեցրել է, որ չի հաջողվել մարմինները նույնականացնել, քանի որ դրանք խիստ քայքայվել էին: Ավելի վաղ մայիսին հնդկական Ութար-Փրադեշի եւ Բիհարի նահանգներում իշխանությունները հայտնել էին Գանգա գետում ավելի քան 100 մարդկային մարմին հայտնաբերելու մասին:
Ենթադրաբար, դրանք կարող են լինել կորոնավիրուսից մահացածների մնացորդները:
Նահանգի ոստիկանությունը սկսել է միջադեպի հետաքննությունը: Ինչպես կարծում են տեղի բնակիչները, մարմինները Գանգա նետելու պատճառը դիակիզման կամ հուղարկավորման խարույկների ինքնուրույն կազմակերպման բարձր արժեքն է՝ ամբողջ Հնդկաստանում COVID-19-ի դեպքերի ռեկորդային ցուցանիշների ֆոնին:
Հնդկաստանի իշխանությունները պահանջել են՝ անհապաղ դադարեցնել մահացածների մարմինները Գանգա գետ նետելը:
Հնդկաստանն աշխարհում երկրորդ տեղում է մնում կորոնավիրուսի հայտնաբերված դեպքերի թվով: Առողջապահության նախարարության վերջին տվյալների համաձայն, COVID-19-ով հիվանդացածների ընդհանուր թիվը երկրում գերազանցել է 28,1 միլիոնը, ապաքինվել է ավելի քան 25,9 միլիոն մարդ, մահացել է 331 հազարից ավելին, իսկ բուժում ստացողների թիվը կազմում է 1,8 միլիոն, հաղորդել է ՌԻԱ Նովոստին:
