«Օնիկ Գասպարյանի ազատման հարցով գնդակն այս պահին Հանրապետության նախագահի դաշտում է». Ռոբերտ Հայրապետյան
![](https://168.am/wp-content/uploads/2021/02/154390241_799776893947879_4259318430072209463_n.jpg)
Երեկ ՀՀ Զինված ուժերի գլխավոր շտաբի պետի առաջին տեղակալ Տիրան Խաչատրյանի՝ վարչապետի կողմից աշխատանքից ազատելուց հետո, այսօր հայտարարությամբ հանդես եկավ ՀՀ Գլխավոր շտաբը՝ պահանջելով Նիկոլ Փաշինյանի և ողջ կառավարության հրաժարականը:
«ՀՀ վարչապետը և կառավարությունն այլևս ի վիճակի չեն ընդունելու ադեկվատ որոշումներ՝ հայ ժողովրդի համար այս ճգնաժամային և ճակատագրական իրավիճակում:
ՀՀ զինված ուժերը երկար ժամանակ համբերատար կերպով հանդուրժում էր գործող իշխանության կողմից զինված ուժերը վարկաբեկելուն ուղղված «գրոհները», սակայն ամեն ինչ ունի իր սահմանները:
ՀՀ զինված ուժերը պատվով է կատարել իր պարտքը, իր ժողովրդի հետ ուս ուսի մարտնչել թշնամու դեմ:
Գործող իշխանությունների անարդյունավետ կառավարումը և արտաքին քաղաքականությունում ցուցաբերած լրջագույն սխալները երկիրը հասցրել են կործանման եզրին:
Ստեղծված իրավիճակով պայմանավորված՝ ՀՀ զինված ուժերը պահանջում են ՀՀ վարչապետի և կառավարության հրաժարականը, միաժամանակ նախազգուշացնում՝ ձեռնպահ մնալ ժողովրդի դեմ ուժ կիրառելուց, ում զավակները զոհվել են՝ պաշտպանելով Հայրենիքն ու Արցախը»,- մասնավորապես գրված էր ԳՇ հայտարարության մեջ:
Հայտարարության տակ ստորագրել էր Գլխավոր շտաբի ողջ կազմը, ներառյալ՝ կորպուսների հրամանատարները:
Նիկոլ Փաշինյանի արձագանքը չուշացավ, նա այս հայտարարությունը համարեց զինված հեղաշրջման փորձ և նախ՝ ֆեյսբուքյան գրառմամբ, ապա ուղիղ եթերով իր կողմնակիցներին դիմեց՝ նրանց բոլորին կանչելով Հանրապետության հրապարակ՝ չմոռանալով հայտարարել, որ Հանրապետության նախագահին է արդեն դիմել ՀՀ ԶՈՒ ԳՇ պետ Օնիկ Գասպարյանին աշխատանքից ազատելու պահանջով:
168.am-ը իրավաբան Ռոբերտ Հայրապետյանից պարզաբանում խնդրեց հետագա գործընթացների իրավական կողմի վերաբերյալ:
«ՀՀ Սահմանադրության 133-րդ հոդվածի համաձայն՝ Զինված ուժերի և այլ զորքերի բարձրագույն հրամանատարական կազմին Նշանակում և ազատում է ՀՀ նախագահը՝ վարչապետի առաջարկությամբ:
Սակայն Սահմանադրության 139-րդ հոդվածը հանրապետության նախագահին լիազորում է համապատասխան ակտը եռօրյա ժամկետում իր առարկություններով վերադարձնել առաջարկություն ներկայացնող կամ միջնորդությամբ դիմող մարմին, այսինքն՝ այս դեպքում՝ ՀՀ վարչապետին: Եթե վարչապետը չի ընդունում այդ առարկությունը, ապա Հանրապետության նախագահը ստորագրում է համապատասխան ակտը կամ դիմում է Սահմանադրական դատարան: Այլ կերպ ասած, Օնիկ Գասպարյանի ազատման հարցով գնդակը այս պահին Հանրապետության նախագահի դաշտում է, և նա լիազորություն ունի այդ ազատումը չստորագրելու»,- ասաց Ռոբերտ Հայրապետյանը: