Ռոբերտ Քոչարյանի փաստաբանները դիմել են Ընդհանուր իրավասության դատարան՝ խափանման միջոցի քննությունն այլ դատավորի մակագրելու համար
Ռոբերտ Քոչարյանի փաստաբանական խմբին հայտնի է դարձել, որ դատավոր Աննա Դանիբեկյանի՝ նիստին ներկա չլինելու պատճառը վիրահատությունն է։ Ռոբերտ Քոչարյանի պաշտպան Հովհաննես Խուդոյանը դիմել է Առաջին ատյանի ընդհանուր իրավասության դատարանի նախագահ Արթուր Մկրտչյանին՝ Քոչարյանի խափանման միջոց կալանքն անձնական երաշխավորությամբ փոխելու վերաբերյալ միջնորդության քննությունն այլ դատավորի մակագրելու խնդրանքով. 168.am-ին ասաց Հովհաննես Խուդոյանը՝ հավելելով, որ պատասխանը կստանան երկուշաբթի՝ մարտի 23-ին:
Ինչպես արդեն տեղեկացրել էինք, Ռոբերտ Քոչարյան և մյուսների գործով հերթական՝ մարտի 17 -ի դատական նիստը տեղի չունեցավ: Պատճառը գործը քննող դատավոր Աննա Դանիբեկյանի վատառողջ լինելն էր:
Այդ դատական նիստում Քոչարյանի պաշտպանական խումբը պատրաստվում էր ՀՀ երկրորդ նախագահին անձնական երաշխավորությամբ ազատ արձակելու միջնորդություն ներկայացնել:
Ռոբերտ Քոչարյանի խափանման միջոց կալանքն անձնական երաշխավորությամբ փոխելու առաջարկով հանդես են եկել ՀՀ նախկին վարչապետներ Վազգեն Մանուկյանը, Խոսրով Հարությունյանը և Կարեն Կարապետյանը, ինչպես նաև Արցախի նախկին վարչապետ Անուշավան Դանիելյանը։
Քոչարյանի փաստաբանական խմբի ներկայացուցիչ Հայկ Ալումյանի խոսքով՝ դատական նիստի չկայանալու մեջ որոշակի միտումներ կան՝ կապված այդ օրը դատարանում ՀՀ և ԱՀ նախկին վարչապետների՝ Ռոբերտ Քոչարյանի համար անձնական երաշխավորությունը ներկայացնելու հանգամանքով:
«Շատ լուրջ հարցեր են առաջանում, և մենք հաջորդ դատական նիստին պահանջելու ենք, որպեսզի դատարանն ավելի մանրամասնի իր առողջական խնդիրները, որոնք որ ունեցել է, եթե բուժում է ստացել, ապա որտեղ է բուժում ստացել, որ մենք կարողանանք հաստատ համոզվել, որ էս ամեն ինչը չի արվել զուտ էն բանի համար, որպեսզի հետագայում երաշխավորներից մեկի կամ երկուսի ներկայությունը դարձնեն անհնար: Մենք ունենք որոշ կասկածներ, որ սա արվեց միտումնավոր, որպեսզի հետագայում այդ 4 երաշխավորներից մեկ-երկուսը հանրապետությունում չլինեն»,- ասել էր փաստաբան Հայկ Ալումյանը:
