Թուրքիայում իշխող ԱԶԿ-ն պահանջում է Դավութօղլուին հեռացնել կուսակցությունից
Թուրքիայի նախագահ Ռեջեփ Թայիփ Էրդողանի գլխավորությամբ գումարված իշխող «Արդարություն և զարգացում» կուսակցության կենտրոնական գործադիր խորհրդի նիստի ընթացքում որոշում է կայացվել Թուրքիայի նախկին վարչապետ Ահմեթ Դավութօղլուին և մի քանի այլ գործիչների հեռացնել կուսակցությունից:
Այս մասին հայտնում է թուրքական «Միլիեթ» լրատվամիջոցը:
Ըստ տեղեկատվության՝ կուսակցությունից հեռացնելու պահանջը ուղարկվել է կուսակցության կարգապահական խորհրդին:
Ահմեթ Դավութօղլուին, Սելչուք Օզդաղին, Այհան Սեֆեր Ուսթունին և Աբդուլլահ Բաշջըին մեղադրում են կուսակցության կանոնադրությանը չհամապատասխանող հայտարարություններով հանդես գալու մեջ:
Ըստ թուրքական մամուլում տարածված տեղեկությունների՝ Ահմեթ Դավութօղլուն մասնակցում է նախկին փոխվարչապետ Ալի Բաբաջանի և Թուրքիայի 11-րդ նախագահ Աբդուլլահ Գյուլի կողմից ստեղծվող նոր կուսակցության աշխատանքներին:
