Մարզահամերգային համալիրի դիմաց կտեղադրվի Կարեն Դեմիրճյանի արձանը
ՀՀ տարածքային կառավարման և ենթակառուցվածքների նախարար Սուրեն Պապիկյանն այսօր գործադիր մարմնի նիստի ժամանակ նախագծի ներկայացրեց, որով նախատեսվում է Կարեն Դեմիրճյանի արձանը տեղադրել Կարեն Դեմիրճյանի անվան մարզահամերգային համալիրի դիմաց։
Ներկայացնելով նախագիծը՝ նախարարը նշեց, որ հուշարձանի տեղադրման աշխատանքների համար կպահանջվի 3մլն 281 հազար դրամ։
«Հարցը քննարկվել է ընտանիքի հետ, եւ հենց այդտեղ արձանը տեղադրելն իրենք են առաջարկել»,- ասաց նախարարը։
Վարչապետ Նիկոլ Փաշինյանն ասաց, որ Կ. Դեմիրճյանի արձանը տեղադրելու որոշում վաղուց կար.
«Երեւանի քաղաքապետարանը առաջարկել է մարզահամերգային համալիրի դիմաց տեղադրել արձանը։ Նաեւ ներկայացվել է արձանի մակետը, որը նույնպես ընդունելի է ե՛ւ Երեւանի քաղաքապետարանի, ե՛ւ ընտանիքի կողմից»։
Նիկոլ Փաշինյանը հետաքրքրվեց, թե երբ հուշարձանը տեղադրված կլինի, Սուրեն Պապիկյանը ժամկետներ չնշեց։
Որոշումն ընդունվեց։
