ՀՀ ԱՆ քրեակատարողական ծառայության պետի շնորհավորական ուղերձը Սահմանադրության օրվա առթիվ
Սիրելի՛ հայրենակիցներ,
Հայ ժողովուրդը, իրեն ուղեցույց դարձնելով հայոց պետականության հիմնարար սկզբունքներն ու համազգային նպատակները, հետամուտ լինելով ազատատենչ նախնիների երազանքին՝ հայրենիքը դարձնել հզոր, ինքնիշխան, բարեկեցիկ և սերունդների համար ապահով երկիր, դեռևս երկու տասնամյակ առաջ այս օրը՝ հուլիսի 5-ին, ընդունեց Հայաստանի Հանրապետության Սահմանադրությունը, որն էլ դարձավ մեր անկախ պետականության կարևորագույն խորհրդանիշը:
Սա մեր բոլորի տոնն է, բոլոր նրանց, որոնք համաժողովրդական քվեարկությամբ մասնակից եղան ժողովրդավարական, սոցիալական և իրավական պետության կառուցմանը, և տոնն է նաև սերունդների, որոնք ապրում և ապրելու են մի երկրում, որտեղ մարդը բարձրագույն արժեք է, և որտեղ մարդու արժանապատվությունն իր իրավունքների և ազատությունների անքակտելի հիմքն է:
Շնորհավորում եմ բոլորիս Սահմանադրության օրվա առթիվ: Սահմանադրության գոյությունը միայն արձանագրված փաստ չէ, այլ այն կարևոր իրողություններից է, որում ամրագրված հիմնարար սկզբունքները կյանքի կոչելով՝ յուրաքանչյուրս մեր ամենօրյա աշխատանքով պիտի խթանենք երկրում զարգացած քաղաքացիական հասարակության ձևավորման գործընթացները և պահպանենք անհատի անխախտելի արժանապատվությունը:
