Արմեն Գևորգյան. «Եվս մեկ անգամ՝ գույքահարկի մասին»
«Գույքահարկի բարձրացման խնդրի մասին» իմ հրապարակումը հետաքրքիր մասնագիտական քննարկման առարկա դարձավ։ Հաշվի առնելով տեսակետների և մոտեցումների բազմազանությունը՝ մեկ անգամ ևս ավելի հակիրճ, բայց հստակ ձևակերպեմ իմ մտահոգությունները։
Գույքահարկի բարձրացումը.
- Չի բարելավի պետբյուջեի վիճակը,
– եթե չեն կրճատվելու բյուջեից համայնքներին տրվող սուբսիդիաները
– չի կոմպենսացնի եկամտահարկի միասնական դրույքաչափի անցման հետևանքով առաջացած՝ բյուջեի կորուստները։
- Տեղական ինքնակառավարման մարմինների վրա դրական ազդեցություն չի ունենա.
– չեն ավելանա նոր ծառայություններ, և չեն բարելավվի հները, եթե սուբսիդիաները կրճատվեն
– կավելանան չվճարված հարկերի ծավալը և դատական հայցերի քանակը
– չի փոխվի տեղական եկամուտների կառուցվածքը
– խնդիրներ կառաջանան նոր, միասնական հարկի վարչարարության հետ
- Բացասական ազդեցություն կունենա քաղաքացիների կենսամակարդակի վրա.
– կմեծացնի յուրաքանչյուր հարկ վճարող ընտանիքի ծախսերը
– քաղաքացիները կորուստներ կունենան իրենց ակտիվների շուկայական արժեքի նվազման պատճառով
– շատերը ստիպված կլինեն վաճառել իրենց անշարժ գույքը
– իր գրավչությունը կկորցնի եկամտահարկի փոխհատուցման ծրագիրը
– փոփոխությունը կհանգեցնի քաղաքացիների սեփականության ստիպված, իրավիճակային օտարման և վերաբաշխման
- Չի նպաստի տնտեսական աճին և ակտիվությանը.
– կդառնա խոչընդոտ հիպոթեքային վարկավորման համար
– հնարավոր կդարձնի ցնցումներն անշարժ գույքի շուկայում
– կնվազեցնի օտարերկրյա ներդրողների հետաքրքրությունն անշարժ գույքի շուկայի նկատմամբ
– շինարարական բիզնեսի համար կավելացնի ռիսկերը
– կհանգեցնի վարձավճարների բարձրացման
– կմեծացնի մանր և միջին բիզնեսի ֆինանսական ծանրաբեռնվածությունը և ծառայությունների արժեքը
– խնդիրներ կառաջացնի արդյունաբերության և գյուղատնտեսության ոլորտում նոր ներդրումային ծրագրերի համար։
Հ.Գ. Մեկ անգամ ևս հիշեցնում եմ։ Գույքահարկի բարձրացման թեման քննարկվել է նաև նախորդ կառավարությունների օրոք, և դա նոր թեմա չէ։ Ես միշտ սկզբունքորեն դեմ եմ եղել դրան՝ վերոնշյալ հիմնավորումների և մտահոգությունների պատճառով։
ԱՐՄԵՆ ԳԵՎՈՐԳՅԱՆ
ՀՀ նախկին փոխվարչապետ
