Հայաստանն աշխարհում առաջին տեղում է գտնվում ինտերնետի աճի տեմպերով
Հայաստանն աշխարհում առաջին տեղում է գտնվում ինտերնետի աճի տեմպերով: Այս մասին այսօր լրագրողների հետ հանդիպման ժամանակ ասաց «Ինտերնետ հանրություն» հ/կ փոխնախագահ Գրիգոր Սաղյանը։ Նրա խոսքով` 2011թ. տվյալների ամփոփումը և արդյունքները հրապարակել է Միջազգային հեռահաղորդակցության միությունը (ITU): Գ. Սաղյանի տեղեկացմամբ, երկար ժամանակ քննարկվում էր, թե ինչու է այդպես, ինչի հաշվին է Հայաստանը գտնվում առաջին տեղում, հետո արդեն գտնվեց պատասխանը:
«Հայաստանն ինտերնետի աճի տեմպերով առաջին տեղում է գտնվում անլար լայնաշերտ ինտերնետի տարածման շնորհիվ»,- ասաց Գ. Սաղյանը` նշելով, որ այդ ամենը տեղի է ունեցել երեք բջջային օպերատորների միջև առաջացած ակտիվ մրցակցության շնորհիվ, ինչից նվազել են ինտերնետի գները և կտրուկ ավելացել է Հայաստանում անլար լայնաշերտ ինտերնետ օգտագործողների թիվը:
