Ջրային համակարգում գոյացել է 8-ից 10.5 միլիարդ դրամի պարտք. Փաշինյանը հանձնարարական տվեց
Ջրային համակարգում մոտավորապես 8-ից 10.5 միլիարդ դրամի պարտք կա: Կառավարության նիստում այս մասին ասաց ՀՀ վարչապետ Նիկոլ Փաշինյանը:
«Խնդիրն ի՞նչի մեջ է. մենք ունենք այսպիսի մեխանիզմներ, երբ ջուրը մատակարարվել է, ջրի դիմաց պարտք է գոյացել, պետք է հասկանանք՝ այդ պարտքն ինչպես է գոյացել։ Գյուղացիները չեն վճարե՞լ, գյուղացիները վճարել են, ընկերությունները չեն հաշվառե՞լ»,- նշեց նա։
Վարչապետն ասաց, թե Հայաստանի բոլոր գյուղացիական տնտեսությունները պետք է իմանան, որ ջրային համակարգի վրա 10.5 միլիարդ դրամի պարտք կա։
«Քիչ հավանական է, որ գյուղացին չի վճարել, մենք ունենք վարկած, որ լուրջ կոռուպցիոն սխեմաներ են գործել», – ասաց ՀՀ վարչապետը։
Պետական վերահսկողական ծառայության ղեկավար Դավիթ Սանասարյանն էլ ասաց, որ այս թեմայով մարտի 15-ին կներկայացնեն ուսումնասիրություններ։
Նիկոլ Փաշինյանն ընդգծեց, որ այս հարցով պետք է շատ լուրջ զբաղվել:
