Ծննդկանի և նորածնի մահվան գործով կալանավորվել է բժիշկ-անեսթեզիոլոգը
Աբովյանի ծննդատանը փետրվարի 25-ին ծննդաբերության ժամանակ 25-ամյա Ֆլորա Աբգարյանի եւ նրա երեխայի մահվան առթիվ նշանակված բոլոր փորձաքննությունների` դատաբժշկական, հանձնաժողովային եւ այլն, եզրակացությունները հայտնի են: Այս մասինհայտնեցին Ոստիկանության լրատվական ծառայությունից:
Ըստ այդմ` բժիշկ- անեսթեզիոլոգ Վլադիմիր Մյագկովը ձերբակալվել, իսկ հուլիսի 13-ին կալանավորվել է: Նրան մեղադրանք է առաջադրվել Քրեական օրենսգրքի 130-րդ հոդվածի 2-րդ մասի հատկանիշներով:
Այդ հոդվածով սահմանվում է բժշկական օգնություն եւ սպասարկում իրականացնողների կողմից մասնագիտական պարտականությունները չկատարելը կամ ոչ պատշաճ կատարել: Եւ եթե այն անզգուշությամբ առաջացրել է բուժվող հիվանդի մահ կամ մարդու իմունային անբավարարության վարակի հարուցիչով վարակում` պատժվում է ազատազրկմամբ` 2-6 տարի ժամկետով` որոշակի պաշտոններ զբաղեցնելու կամ որոշակի գործունեությամբ զբաղվելու իրավունքից զրկելով` առավելագույնը 3 տարի ժամկետով կամ առանց դրա:
Իսկ «Աբովյանի ծննդատուն» ՓԲԸ-ի տնօրեն Լարիսա Մադոյանը NEWS.am-ի թղթակցի հետ զրույցում ասաց, որ դեպքի հաջորդ օրվանից բժիշկն իրենց մոտ չէր աշխատում:
Նա նշեց, որ Վլադիմիր Մյագկովն աշխատել է տարբեր հիվանդանոցներում, նա «Մալաթիա» բժշկական կենտրոնի բժիշկներից էր, որտեղի աշխատանքը համատեղում էր «Աբովյանի ծննդատան» աշխատանքի հետ:
Ըստ փորձաքննության եզրակացության` մահը վրա է հասել մեխնիկական շնչահեղձության արդյունքում, ինչը նշանակում է, որ ինկուբացիայի ընթացքում վնասվել է կոկորդը, լեզվարմատը, որից արյունահոսություն է եղել դեպի շնչափող եւ դրանից շնչահեղձ է եղել կինը»,- նշեց նա:
Հիշեցնենք, որ Ֆլորա Աբգարյանը գտնվում էր նախածննդյան հսկողության ներքո, պետք է վիրահատվեր փետրվարի 27-ին, սակայն փետրվարի 25-ի առավոտյան կնոջ մոտ ցավեր էին սկսվել եւ ժամը 11.40-ի սահմաններում դիմել էր ծննդատուն: Կարճ ժամանակահատվածում արվել էին անհրաժեշտ հետազոտությունները, որովհետեւ հիմնական հետազոտություններն արվել էին նախածննդյան հսկողության ժամանակ: Վիրահատությունն սկսելուց 10-12 րոպե հետո նարկոզային շրջանում կնոջ մոտ առաջացել է դժվար կառավարվող վիճակ, սրտի կանգ եւ բրոնխո սպազմ:
Այն ժամանակվա առողջապահության նախարար Հարություն Քուշկյանի հրամանով դեպքի ուսումնասիրման նպատակով հանձնաժողով էր ստեղծվել եւ հանձնախումբը` առողջապահության նախարարի տեղակալ Վահան Պողոսյանի գլխավորությամբ տեղում ուսումնասիրություններ էր իրականացրել կազմակերպչական խնդիրներ եւ այլ հանգամանքներ պարզելու համար:
