ԵՄ-ն դատապարտել է Իրանի «ագրեսիան» Թեհրանում ֆրանսիացի դիվանագետների նկատմամբ
Եվրամիությունը երեքշաբթի դատապարտել է այս ամիս Թեհրանում երկու ֆրանսիացի դիվանագետների նկատմամբ իրանական անվտանգության ուժերի դրսևորած «ագրեսիան», հայտնում է Ֆրանսպրես գործակալությունը։
«ԵՄ-ն միանշանակ դատապարտում է հուլիսի 19-ին Թեհրանում Ֆրանսիայի դեսպանատան երկու դիվանագետների վրա իրանական անվտանգության ուժերի կողմից իրականացված հարձակումը»,- հայտարարել է ԵՄ դիվանագիտության ղեկավար Կայա Կալլասը։
Նրա խոսքով՝ նման գործողությունները «Վիեննայի կոնվենցիաների ակնհայտ խախտում» են և վտանգում են դիվանագիտական հարաբերությունների բուն հիմքը։
Ավելի վաղ Ֆրանսիան հայտարարել էր, որ իր դիվանագետները ենթարկվել են «ահաբեկման չափազանց լուրջ ակտի» իրանական անվտանգության ուժերի կողմից։ Ըստ Ֆրանսիայի արտաքին գործերի նախարար Ժան-Նոել Բարրոյի՝ դեսպանատան աշխատակիցներից մեկը ենթարկվել է ֆիզիկական բռնության։
«Երկու դիվանագետներն առանց բացատրության ձերբակալվել են մի քանի ժամով, հարցաքննվել, իսկ նրանցից մեկը ենթարկվել է ֆիզիկական բռնության։ Դրանից հետո նրանք կարողացել են վերադառնալ դեսպանատուն»,- հայտնել է Բարրոն հուլիսի 20-ի իր հայտարարության մեջ։
Իրանի արձագանքը
Երկուշաբթի Իրանի ԱԳՆ-ն կանչել է Ֆրանսիայի դեսպանին՝ ֆրանսիացի դիվանագետների գործողությունների կապակցությամբ բողոք հայտնելու համար։
Իրանի արտաքին քաղաքական գերատեսչության ներկայացուցիչը հայտարարել է, որ դեսպանատան աշխատակիցները «միջամտել են Իրանի ներքին գործերին՝ քաղաքացիական հասարակության հետ փոխգործակցության պատրվակով»։
