ԱՄՆ-ում պատրաստվում են առաջ մղել Ռուսաստանի դեմ պատժամիջոցների խստացման նոր օրինագիծ
ԱՄՆ Սենատի մի խումբ անդամներ հայտարարել են Ռուսաստանի դեմ պատժամիջոցների խստացման մասին օրինագծի ընդունման հարցում Սպիտակ տան հետ համաձայնության հասնելու մասին։
Այս մասին գրավոր հայտարարություն են տարածել սենատորներ Ջին Շահինը, Ռիչարդ Բլումենթալը, Ռոջեր Ուիքերը և Լինդսի Գրեմը (ՌԴ-ում ներառված է ահաբեկիչների և ծայրահեղականների ցանկում), որոնք ներկայացնում են ԱՄՆ-ի ինչպես իշխող Հանրապետական, այնպես էլ ընդդիմադիր Դեմոկրատական կուսակցությունները։
Սենատորները հայտարարել են, որ «համաձայնության են եկել Թրամփի վարչակազմի հետ՝ Ռուսաստանի նկատմամբ պատժամիջոցների վերաբերյալ թարմացված օրինագծի առաջխաղացման հարցում»։ Նրանք նշել են, որ ակնկալում են «շատ շուտով ներկայացնել այդ օրինագիծը»։
Խոսքը վերաբերում է օրինագծին, որը երկկուսակցական սենատորների խումբը ներկայացրել էր 2025 թվականի ապրիլի սկզբին։ Փաստաթղթի հիմնական հեղինակներն էին Գրեմն ու Բլումենթալը։ Նախաձեռնությունը, մասնավորապես, նախատեսում է Ռուսաստանի առևտրային գործընկերների նկատմամբ երկրորդային պատժամիջոցների կիրառում։ Օրենսդիրների առաջարկում նշված էր նաև 500 տոկոս ներմուծման մաքսատուրք սահմանելու հնարավորությունը այն երկրների նկատմամբ, որոնք Ռուսաստանից գնում են նավթ, գազ, ուրան և այլ ապրանքներ։
Միևնույն ժամանակ, ԱՄՆ սենատոր Ռենդ Փոլը նախազգուշացրել էր, որ նման օրինագծի ընդունման դեպքում ամենամեծ վնասը կարող են կրել հենց Միացյալ Նահանգները՝ «ինչպես տնտեսական, այնպես էլ ռազմավարական առումով»։ Այս մասին նա գրել էր նախորդ տարի «Responsible Statecraft» պարբերականում հրապարակված հոդվածում։
ԱՄՆ ֆինանսների նախարար Սքոթ Բեսենթը 2026 թվականի հունվարին հայտնել էր, որ Վաշինգտոնի վարչակազմը համարում է այս օրինագիծը ոչ անհրաժեշտ, քանի որ ԱՄՆ նախագահ Դոնալդ Թրամփն առանց այդ էլ ունի ոլորտում համապատասխան լիազորություններ։
