Նեթանյահուի «վետոն». Իսրայելը փորձում է խոչընդոտել ԱՄՆ-Թուրքիա ռազմական գործարքին
Իսրայելի վարչապետ Բենյամին Նեթանյահուն Fox News-ին տված հարցազրույցում կոչ է արել Վաշինգտոնին հրաժարվել Թուրքիային F-35 կործանիչներ կամ KAAN ինքնաթիռների համար ամերիկյան շարժիչներ վաճառելու մտադրությունից։
Ըստ Նեթանյահուի՝ նման գործարքը կխաթարի Մերձավոր Արևելքում ուժերի հավասարակշռությունը, որը հիմնված է «իսրայելական ավիացիայի գերակայության» վրա։ Անկարան, իր հերթին, կենսական անհրաժեշտություն ունի ամերիկյան F110 շարժիչների՝ սեփական հինգերորդ սերնդի KAAN կործանիչի նախագիծը կյանքի կոչելու համար։
Իրավիճակը լարվում է Թուրքիայում կայանալիք ՆԱՏՕ-ի գագաթնաժողովի նախաշեմին.
ԱՄՆ վարչակազմն արդեն տեղեկացրել է Կոնգրեսին Թուրքիային ավելի քան 700 մլն դոլարի շարժիչներ վաճառելու մտադրության մասին, իսկ Դոնալդ Թրամփը ակնարկել է, որ Էրդողանին «շատ երջանիկ» կդարձնի։
Նեթանյահուի հրապարակային հայտարարությունը գնահատվում է որպես փորձ՝ ազդելու Թրամփի որոշման վրա՝ օգտագործելով հանրապետականների հասարակական կարծիքը՝ անմիջապես ԱՄՆ նախագահի՝ Թուրքիա կատարելիք այցից առաջ։
Ակնհայտ է, որ Թել Ավիվը փորձում է արգելակել Անկարայի ռազմաարդյունաբերական հզորացումը՝ անգամ ԱՄՆ-ի հետ դաշնակցային հարաբերությունների ֆոնին։
