Բելառուսը պատրաստ է ԵԱՏՄ շրջանակներում կիսվել սեփական տեխնոլոգիաներով. վարչապետ
Բելառուսը պատրաստ է կիսվել իր տեխնոլոգիաներով և աշխատատեղեր ստեղծել ԵԱՏՄ գործընկերների տարածքում։ Այս մասին հայտարարել է Բելառուսի վարչապետ Ալեքսանդր Տուրչինը:
«Առանց սահմանների արտադրության շրջանակներում Բելառուսը պատրաստ է ապահովել սեփական տեխնոլոգիաների փոխանցումը և ժամանակակից աշխատատեղերի ստեղծումը մեր գործընկերների տարածքում», – ասել է Տուրչինը «Արդյունաբերություն 360. արտադրություն առանց սահմանների» խորագրով ցուցահանդեսում, որն անցկացվում է Եկատերինբուրգում «Իննոպրոմ-2026» միջազգային արդյունաբերական ցուցահանդեսի շրջանակներում։
Բելառուսի կառավարության ղեկավարը բարձր է գնահատել Եվրասիական տնտեսական միության շրջանակներում արդյունաբերական կոոպերացիայի հնարավորությունները: «Արդյունաբերական կարողությունները հումքային բազայի և հնգյակի երկրների մտավոր ուժերի հետ համատեղելը իսկապես անսպառ ռեսուրս է», – ընդգծել է նա:
Տուրչինի խոսքով՝ Միութենական պետությունում գործարկված է «Արդյունաբերություն 360»-ի համար իդեալական էկոհամակարգի ներուժը։ «Բելառուսա-ռուսական ինտեգրման և կոոպերացիայի բարձր մակարդակը կարող է ապահովել առանց սահմանների արտադրության նույն ամբողջական ցիկլը։ Մեր երկրների ղեկավարների կողմից ընդունվող որոշումները, կառավարությունների համատեղ աշխատանքը, միջտարածաշրջանային սերտ կապերը, համատեղ նախագծերի և ծրագրերի իրականացումը՝ այս ամենն ապահովել են ոչ միայն երկրների միջև փոխադարձ առևտրի աճը, այլև տեխնոլոգիական անվտանգության ամրապնդումը», – ասել է նա։
«Իննոպրոմ-2026» միջազգային արդյունաբերական ցուցահանդեսը տեղի է ունենում Եկատերինբուրգում հուլիսի 6-9-ը։ Ցուցահանդեսի համաժողովում ներառված է ավելի քան հարյուր միջոցառում: Իրենց ազգային ցուցադրությունները ներկայացնում են հինգ երկրներ՝ Ինդոնեզիան, Ղազախստանը, Ուզբեկստանը, Ղրղզստանը և Բելառուսը:
