Գերմանիայում նուտրիաները վտանգի տակ են դրել տեղական էկոհամակարգը. Bild
Գերմանիայի էկոհամակարգին վտանգ է սպառնում Հարավային Ամերիկայից ծագող ինվազիվ նուտրիաների տարածման պատճառով։ Այս մասին հայտնել է Bild թերթը՝ հղում անելով Գերմանական որսորդական միության (DJV) տվյալներին։
«Հարավային Ամերիկայից ծագող նուտրիաները համարվում են ինվազիվ տեսակ։ Գերմանիայում նրանք բնական գիշատիչներ չունեն։ Այս կենդանիները ոչնչացնում են եղեգնուտները՝ դրանով վտանգի տակ դնելով թռչունների, ձկների և երկկենցաղների բազմաթիվ տեսակների։ Նրանք նաև քայքայում են պատվարները՝ նվազեցնելով ջրհեղեղներից պաշտպանության արդյունավետությունը»,- ասվում է հրապարակման մեջ։
Ինչպես նշել են DJV-ում, 2024–2025 թվականների որսաշրջանում որսացվել է ավելի քան 130 հազար նուտրիա, ինչը 14,5 հազարով գերազանցում է նախորդ շրջանի ցուցանիշը։ Միությունում նշել են կենդանիների արագ տարածումը ամբողջ Գերմանիայում։
Այդ կապակցությամբ DJV-ում պնդում են զանգվածային ոչնչացման անհրաժեշտության վրա, որպեսզի զսպեն պոպուլյացիայի աճը և պահպանեն էկոլոգիական հավասարակշռությունը։
