Կիևը հաստատել է, որ Ռումինիայի ափերի մոտ ուկրաինական անօդաչու նավակ է պայթել
Ուկրաինայի ռազմածովային ուժերից հաստատել են, որ Ռումինիայի նավահանգստում ուկրաինական անօդաչու նավակ է պայթել՝ ռուսական համակարգերի կողմից ճնշման պատճառով։ Այս մասին հաղորդում է BBC-ի ռուսական ծառայությունը։
«Սևծովյան օպերատիվ գոտում առաջադրանքներ կատարելիս Ուկրաինայի զինված ուժերի անօդաչու նավակներից մեկը կորցրել է կառավարումը թշնամու ռադիոէլեկտրոնային պայքարի միջոցների ազդեցության պատճառով և հայտնվել Ռումինիայի ափերի մոտ», – ասվում է Ուկրաինայի ռազմածովային ուժերի հայտարարության մեջ։
Ռումինիայի պաշտպանության նախարարության տվյալներով՝ ծովային անօդաչուն հայտնաբերվել է Կոնստանցայի նավահանգստում առավոտյան ժամը 6:00-ի սահմաններում։ Այն պայթել է առավոտյան ժամը 10:30-ին։ Վիրավորներ կամ ավերածություններ չեն եղել։
Գերատեսչությունը նշել էր, որ անօդաչու նավակը նման է Ուկրաինայում պատերազմի ժամանակ օգտագործվող նավակներին, բայց չի նշել, թե որ կողմն է այն օգտագործում։
