Էնդոկրինոլոգը նշել է շաքարախտի առաջին նշանները
Շատերը հիվանդությունն անմիջապես չեն հայտնաբերում, քանի որ շաքարախտի տեսանելի ախտանիշները կարող են բացակայել վաղ փուլերում: Այնուամենայնիվ, կան նշաններ, որոնց արժե ուշադրություն դարձնել, ասել է էնդոկրինոլոգ Իրինա Լենկինան:
Նա հիվանդության առաջին նշանները թվարկել է Lenta.ru-ի հետ զրույցում:
Մասնագետը բացատրել է, որ մարդը հաճախ չի կապում 2-րդ տիպի շաքարախտին բնորոշ ախտանիշները պաթոլոգիայի հետ, բայց դրանք առկա են։ Խոսքը մշտական ծարավի և բերանի չորության, հաճախակի միզարձակման (հատկապես գիշերը), քրոնիկ հոգնածության, ինչպես նաև վերքերի ոչ արագ լավացման հետ կապված խնդիրների մասին է։ Այնուամենայնիվ, քաշի և շաքարախտի ռիսկի միջև կապը հատուկ ուշադրության է արժանի, ընդգծել է Լենկինան։
«Հետազոտությունները ցույց են տալիս, որ նորմալ քաշ ունեցող մարդկանց մոտ հասուն տարիքում 5-7 կիլոգրամ քաշի ավելացումը մոտ երկու անգամ մեծացնում է 2-րդ տիպի շաքարախտի զարգացման ռիսկը՝ ի տարբերություն նրանք, ովքեր պահպանում են կայուն քաշը։ Ավելին, անհասկանալի քաշի ավելացումն ինքնին, հատկապես որովայնի շրջանում, կարող է լինել շաքարախտի վաղ նշան»,- բացատրել է բժիշկը։
Լենկինան նշել է, որ ավելորդ քաշը հաճախ քողարկում է հիվանդության իրական ախտանիշները և հետաձգում ախտորոշումը:
Նրա խոսքով՝ հիվանդները բողոքում են շնչառության դժվարացումից, թուլությունից և ծարավի ուժեղացումից, սակայն այդ ախտանիշները վերագրում են ավելորդ քաշին, այլ ոչ թե հնարավոր չախտորոշված պաթոլոգիային:
Բժշկի խոսքով՝ շաքարախտի դեմ պաշտպանության առաջին գործոնը կենսակերպի փոփոխությունն է՝ ֆիզիկական ակտիվության ավելացում, հավասարակշռված սննդակարգի անցում և քաշի կորուստ:
