Հիքմեթ Հաջիևը խոսել է Հայաստանի հետ խաղաղության և համագործակցության վերաբերյալ Բաքվի պատրաստակամության մասին
Երկար տարիների հակամարտությունից հետո Հայաստանի հետ հարաբերությունների կարգավորումը վկայում է տարածաշրջանում խաղաղության և կայունության հասնելու Բաքվի ձգտման մասին։ Այս մասին «Գլոբալ Հարավի» ՀԿ-ների պլատֆորմի գագաթնաժողովի ժամանակ հայտարարել է Ադրբեջանի նախագահի օգնական, նախագահի աշխատակազմի արտաքին քաղաքականության բաժնի ղեկավար Հիքմեթ Հաջիև, փոխանցում են ադրբեջանական լրատվամիջոցները։
Հաջիևը հայտարարել է, որ Ադրբեջանը, իբր, բախվել է «օկուպացիայի և ռազմական ագրեսիայի»։ «Այնուամենայնիվ, մեզ հաջողվեց վերջ դնել դրան, վերականգնել մեր ինքնիշխանությունն ու տարածքային ամբողջականությունը, ինչպես նաև համագործակցության և փոխգործակցության գործընթաց սկսել հարևան Հայաստանի հետ», — հայտարարել է Հաջիևը։
Նրա խոսքով՝ դա ցույց է տալիս Ադրբեջանի բարի կամքը, խաղաղության ձգտումը և Հարավային Կովկասում նոր իրողությունների ձևավորման պատասխանատվությունը ստանձնելու պատրաստակամությունը։
