«Եվրոպան չպիտի ընկնի թուրքական ազդեցության տակ». Եվրահանձնաժողովի նախագահ
Եվրոպական հանձնաժողովի նախագահ Ուրսուլա ֆոն դեր Լայենի հայտարարությունը, ըստ որի, Եվրոպան չպետք է ընկնի «ռուսական, չինական կամ թուրքական ազդեցության տակ», քննադատության է արժանացել՝ ԵՄ սկզբունքներին հակասելու տեսանկյունից։ Այս մասին տեղեկացնում է ermenihaber.am-ը։
Թուրքական մամուլի հրապարակումներում նշվում է, որ Թուրքիան շարունակում է մնալ Եվրամիությանն անդամակցելու թեկնածու երկիր, և նման ձևակերպումները նվազեցնում են միության ընդլայնման քաղաքականության վստահելիությունը, ինչպես նաև Ռուսաստանի կամ Չինաստանի հետ Թուրքիային նույն հարթության վրա դնելը վնասում է գործընկերային հարաբերություններին։
Նշվում է նաև, որ նման հայտարարությունները խորացնում են ԵՄ նկատմամբ «կրկնակի ստանդարտների» ընկալումը և կարող են բացասաբար ազդել տարածաշրջանային կայունության վրա։ Ասվում է նաև, որ ԵՄ–Թուրքիա հարաբերությունները հիմնված են փոխադարձ շահերի վրա, մասնավորապես, էներգետիկայի, առևտրի և անվտանգության ոլորտներում, և դրանք պետք է դիտարկվեն որպես համագործակցություն, ոչ թե մրցակցություն։
Ասվում է, որ կողմերի միջև վստահության պակասը պահպանվում է, իսկ հարաբերությունների բարելավման համար անհրաժեշտ են նոր քաղաքական նախաձեռնություններ ու երկխոսություն։
