Հալկից հետո առաջինը. Էդուարդ Սպերցյանի աներևակայելի ցուցանիշը Ռուսաստանում
«Կրասնոդարի» և Հայաստանի ազգային հավաքականի կիսապաշտպան Էդուարդ Սպերցյանը Ռուսաստանի Պրեմիեր լիգայի ընթացիկ մրցաշրջանի 22 հանդիպումներում արդեն 25 արդյունավետ գործողության հեղինակ է դարձել։
Ինչպես հայտնում է Opta Sports-ը, 22-րդ տուրից հետո գրանցված այս ցուցանիշը լավագույնն է ՌՊԼ-ում՝ Սանկտ Պետերբուրգի «Զենիթի» նախկին հարձակվող Հալկի ժամանակներից ի վեր։ Բրազիլացին 2015/2016 մրցաշրջանի նույն ժամանակահատվածում աչքի էր ընկել 27 արդյունավետ գործողությամբ։
Սպերցյանին ընդամենը երկու միավոր է բաժանում մեկ մրցաշրջանի կտրվածքով «Կրասնոդարի» բացարձակ ռեկորդը կրկնելուց։ Այդ ռեկորդը պատկանում է ակումբի նախկին ֆուտբոլիստ Ֆյոդոր Սմոլովին, որը նույն՝ 2015/2016 մրցաշրջանում գրանցել է 27 արդյունավետ գործողություն։
Նշենք, որ ՌՊԼ-ի 22 տուրերից հետո «Կրասնոդարը» վաստակած 49 միավորով գլխավորում է մրցաշարային աղյուսակը՝ ընդամենը մեկ միավորով գերազանցելով երկրորդ տեղում ընթացող «Զենիթին»։
Armsport.am
