Իրանի նախագահի որդին հայտնել է, որ նոր հոգևոր առաջնորդն ապահով է և անվնաս
Իրանի նոր հոգևոր առաջնորդ Մոջթաբա Խամենեին ապահով է և անվնաս՝ ի հեճուկս ռազմական գործողությունների ընթացքում վիրավորվելու մասին տեղեկությունների։ Այս մասին «Տելեգրամ»-ում հայտարարել է Իրանի նախագահի որդին՝ Յուսեֆ Փեզեշքիանը։
«Տեղեկություններ լսեցի այն մասին, թե Մոջթաբա Խամենեին վիրավորվել է։ Հարցրեցի որոշ ընկերներիս, ովքեր կապեր ունեն։ Նրանք ինձ ասացին, որ փառք Աստծո, նա ողջ է և անվտանգ»,- հայտնել է Յուսեֆ Փեզեշքիանը։
Նոր գերագույն առաջնորդն Իրանի երկարամյա ղեկավար այաթոլլա Ալի Խամենեիի որդին և իրավահաջորդն է։ Ալի Խամենեին սպանվել էր, երբ ԱՄՆ-ն և Իսրայելը փետրվարի 28-ին հարվածներ էին հասցրել Իրանին։ Նրա հետ միասին սպանվել էին դուստրը, հարսը, փեսան, 14 ամսական թոռնուհին, իսկ օրեր անց հիվանդանոցում ստացած ծանր վնասվածքներից մահացել էր նաև այաթոլլայի 79-ամյա կինը՝ Մանսուրե Բաղերզադեն:
56-ամյա Խամենեին նախկինում հազվադեպ է հանրությանը ներկայացել կամ ելույթ ունեցել պաշտոնական միջոցառումների ժամանակ, և դեռևս չի դիմել ազգին կամ գրավոր հայտարարություն չի արել մարտի 8-ին գերագույն առաջնորդ հռչակվելուց ի վեր։
