Դանիայում մեծ ցույցեր են նախատեսվում՝ «Ձեռքերդ հեռո՛ւ Գրենլանդիայից» կարգախոսով
Շաբաթ օրը Դանիայում և Գրենլանդիայում զանգվածային ցույցեր են նախատեսվում՝ ի նշան ԱՄՆ նախագահ Դոնալդ Թրամփի կողմից Արկտիկական կղզին բռնագրավելու ծրագրերի դեմ բողոքի, հաղորդում է AFP-ն։
Հազարավոր մարդիկ սոցիալական ցանցերում հայտնել են, որ մտադիր են մասնակցել երթերին և հանրահավաքներին, որոնք կազմակերպվել են գրենլանդացիների ասոցիացիաների կողմից Կոպենհագենում, Օրհուսում, Օլբորգում, Օդենսեում և Գրենլանդիայի մայրաքաղաք Նուուկում։
«Նպատակն է հստակ և միասնական ուղերձ հղել՝ Գրենլանդիայի ժողովրդավարությունը և մարդու հիմնարար իրավունքները հարգելու վերաբերյալ»,- ասվում է Դանիայի գրենլանդացիների «Uagut» ասոցիացիայի կայքում։
Բողոքի ցույցերը հաջորդել են ուրբաթ օրը Թրամփի հնչեցրած նախազգուշացմանը, ըստ որի՝ նա կարող է մաքսատուրքեր սահմանել այն երկրների նկատմամբ, որոնք դեմ են Գրենլանդիան զավթելու իր ծրագրերին, որը Դանիայի ինքնավար տարածք է հանդիսանում։
Կազմակերպիչների խոսքով՝ Նուուկում ցույցը պետք է սկսվի տեղական ժամանակով 16:00-ին (Գրինվիչի ժամանակով 15:00-ին)՝ «Միացյալ Նահանգների ապօրինի ծրագրերի դեմ Գրենլանդիայի նկատմամբ վերահսկողություն հաստատելու համար»։ Ցուցարարները Գրենլանդիայի դրոշներով կշարժվեն դեպի ԱՄՆ հյուպատոսություն: Կոպենհագենում հանրահավաքը նախատեսված է եղել սկսել ժամը 12:00-ին և պետք է ավարտվեր Դանիայի մայրաքաղաքում գտնվող ԱՄՆ դեսպանատան մոտ՝ մոտավորապես մեկ ժամ անց:
Բողոքի ցույցերը սկսվել են այն բանից հետո, երբ ԱՄՆ Կոնգրեսի անդամների երկկուսակցական պատվիրակությունը երկօրյա այցով մեկնել էր Կոպենհագեն՝ Դանիային և Գրենլանդիային աջակցելու համար՝ հայտարարելով, որ ամերիկացի ժողովուրդը չի կիսում ԱՄՆ նախագահի տարածքային հավակնությունները։ Եվրոպացիները նույնպես աջակցություն են ցուցաբերել Գրենլանդիային ռազմական հետախուզական առաքելության ընթացքում, որին, ըստ դանիացի գեներալի, հրավիրված է եղել նաև Վաշինգտոնը։
Թրամփի ավագ խորհրդական Սթիվեն Միլլերը ուրբաթ օրը Fox News-ին հայտնել է, որ այս շաբաթ Սպիտակ տանը Միացյալ Նահանգների, Դանիայի և Գրենլանդիայի բարձրաստիճան պաշտոնյաների միջև տեղի են ունեցել «դրական նախնական բանակցություններ»։ Սակայն նա կրկնել է, որ Թրամփը «հստակ հասկացրել է», որ ինքը ցանկանում է, որ Միացյալ Նահանգները վերահսկեն կղզին։
