Իսպանիայի ոստիկանությունը վերադարձրել է գողացված՝ 6-րդ դարի վեստգոթական ոսկե թագը
Իսպանիայի ազգային ոստիկանությունը Լեոնի նահանգում հայտնաբերել է 6-րդ դարի վեստգոթական ոսկե թագ, արծաթե մետաղադրամներ և այլ հնագիտական գտածոներ, որոնք պատմական մեծ արժեք են ներկայացնում: Այս մասին ասվում է Իսպանիայի իրավապահ մարմինների մամուլի հաղորդագրության մեջ:
Ձերբակալվել է յոթ մարդ։ Նրանց մեղադրում են հանցավոր կազմակերպությանն անդամակցության, պատմական ժառանգության դեմ հանցագործության, փողերի լվացման և ծանրացուցիչ հանգամանքներում գողության համար։ Կասկածյալները մասնակցել են Լեոնում և Վալյադոլիդում պեղումների մի քանի վայրերի կողոպուտներին։
Չարագործներն օգտագործել են մետաղորսիչներ, որոնցից մեկը եղել է բարձրտեխնոլոգիական և ունակ՝ թափանցելու մեծ խորություններ: Այնուհետև նրանք վաճառել են արտեֆակտները:
Քննիչները կարծում են, որ գողացված հնագիտական գտածոների վաճառքից շահույթը կարող է գերազանցել մեկ միլիոն եվրոն: Առգրավված արտեֆակտները կհանձնվեն թանգարան՝ ուսումնասիրության համար:
