Ղարաբաղը տանք հայերին, Մեղրին՝ Ադրբեջանին. ի՞նչ էր առաջարկել Թուրգուտ Օզալը Բուշ ավագին. Սուրեն Սարգսյան
«Պրեսսինգ» հաղորդաշարում Սաթիկ Սեյրանյանի հյուրը՝ քաղաքագետ, «Ամերիկյան հետազոտությունների հայկական կենտրոնի» ղեկավար Սուրեն Սարգսյանը, անդրադարձավ տարածաշրջանային խնդիրների խորքային պատճառներին:
«Դեռևս 90-ականների սկզբին՝ մինչև Խորհրդային Միության փլուզումը, կար հայտնի Գոբլի պլանը: Այդ պլանի նպատակը ո՞րն էր: Կա մի փաստաթուղթ, խոսակցության սղագրություն Ամերիկայի Միացյալ Նահագների և Թուրքիայի նախագահների միջև: Այդտեղ Թուրքիայի նախագահ Թուրգուտ Օզալը Ջորջ Բուշ ավագին ասում է՝ եկե՛ք փոխանակենք Արցախը Մեղրիի հետ, բնակչությունները տեղահանենք, Մեղրին տանք Ադրբեջանին, Արցախը տանք հայերին:
Երբ Բուշը հարցնում է՝ իսկ դա մեզ ի՞նչ է տալու, Օզալն ասում է, որ Կենտրոնական Ասիայի բոլոր էներգետիկ ռեսուրսները՝ նավթը, գազը և այլն, կշրջանցեն Ռուսաստանը և այդ տարածքով կգնան դեպի Եվրոպա, որպեսզի Եվրոպան կախվածություն չունենա Ռուսաստանից, այլ կախվածություն ունենա Թուրքիայից: Ասում է՝ մենք էլ ձեր ռազմավարական դաշնակիցն ենք: Այսինքն՝ շատ հետաքրքիր իրավիճակ է նկարագրված, որն ըստ էության այսօրվա դրությամբ կյանքի է կոչվում»,- ասաց Սուրեն Սարգսյանը:
Նրա խոսքով՝ սա շատ հետաքրքիր պրոցես է, որը կյանքի է կոչվում՝ սկսած ԽՍՀՄ գոյության վերջին շրջանից: Այս փաստաթուղթն ամբողջությամբ նկարագրում է այն քաղաքական պրոցեսները, որոնք այն ժամանակվանից մինչ օրս կյանքի են կոչվել:
«Եվ մի՛ մոռացեք, որ գերտերությունների համար ժամանակի ու չափման միավորն ուրիշ է: 25-30 տարում ինչ-որ արդյունքի հասնելը նորմալ է: Նրանք ավելի հեռահար պլաներ են մշակում և կյանքի կոչում»,- ասաց Սուրեն Սարգսյանը:
Մանրամասները՝ տեսանյութում:
