Փաշինյանի հետ հանդիպումը Վեհափառին ուրանա՞լ է նշանակում, թե՞ ոչ․ Սրբազանը Փաշինյանին հանդիպել պատրաստ էր, այդ մասին զրուցել՝ ոչ
Օրերս Մայր Աթոռ Սուրբ Էջմիածնում Եպիսկոպոսաց ժողովից հետո հայտարարության միասնական տեքստ էր տարածվել, որտեղ ասվում էր․ «Ժողովը կարևոր նկատեց, որ հոգևորականները չտրվեն պառակտիչ գործողությունների և սադրանքների, պահպանեն միաբանության ոգին՝ հանուն Առաքելական մեր Սուրբ Եկեղեցու անսասանության և առավել զորացման»։
Սա չխանգարեց, որ այս կոչերից հետո այդ ժողովին ներկա 9 եպիսկոպոսներ մտնեն կառավարության շենք և հանդիպեն, օրինակ, այդ պառակտման արմատին՝ Նիկոլ Փաշինյանին։
Ավելին, Վեհափառ Հայրապետի շնորհիվ իրենց ծառայության մեջ հաստատուն մնացած շատ սրբազաններ նույնիսկ խոնարհաբար սեղմեցին պաշտոնյայի ձեռքը, որը եկեղեցու առաջնորդին ուղղակի դիմում է ավազանի անունով։
Ի դեպ, որքան էլ տարօրինակ է, այս եպիսկոպոսների թվում էր նաև Արցախի թեմակալ առաջնորդը, որի պաշտոնը, եթե այս իշխանության տրամաբանությամբ շարժվելու լիներ վեհափառը, ուղղակի չէր լինի վաղուց, քանի որ Նիկոլն ու իր թիմն ուղիղ ասում են՝ չկա Արցախը։
Ինչևէ, հանդիպումից հետո այս 9 սրբազաններն անցել են ջրի հատակը, իսկ նրանցից մեկ-երկուսն ինչ-որ պարզաբանումներ են տվել իրենց հարմար հարթակներով, ու մի կողմ թողնելով՝ «ով անմեղ է, թող առաջինը քար նետի» աստվածաշնչյան պատգամը, սկսել են նախշազարդել իրենց եղբորը և իրենց առաջնորդին։
Նրանք ներկա չէին նաև այսօրվա պատարագին․ ժողովրդի լեզվով ասած՝ «թիկունքից խփել ու թռել են»։
Այս հոգևորականներին ուղղված մեր զանգերը ևս անպատասխան են մնում․ այսօր միայն ստացվեց ուղղակի հակիրճ խոսել Աբրահամ Սրբազանի հետ։
168․am-ը հոգևորականին նախ շնորհավորեց Հայոց առաջին լուսավորիչներ Սուրբ Թադեոս և Սուրբ Բարդուղիմեոս առաքյալների տոնի առթիվ, ապա նրանից հետաքրքրվեց․ «Կառավարությունում Ձեր հանդիպումը արդյո՞ք Վեհափառ Հայրապետին ուրանա՞լ է նշանակում, թե՞ ոչ»։
Նա, ի պատասխան, ասաց․ «Ես իրապես պատրաստ չեմ հիմա Ձեզ հարցազրույց տալ»։
