Կատարում ՀԱՄԱՍ-ի առաջնորդներին հարված հասցրած իսրայելական ինքնաթիռները թռիչք են կատարել Ադրբեջանի տարածքից
Ըստ հայտնի եգիպտացի լրագրող Իմադ ադ-Դին Ադիբի՝ Կատարում ՀԱՄԱՍ-ի առաջնորդներին հարվածած իսրայելական կործանիչները թռիչք են կատարել Ադրբեջանի տարածքից։ Արաբական Միացյալ Էմիրությունների Al Mashhad ալիքով ելույթ ունենալով՝ Ադիբը ուշադրություն է հրավիրել Բաքվի և Թել Ավիվի միջև սերտ հետախուզական և ռազմական համագործակցության վրա, գրում է ԻՀՊԿ-ի թելեգրամյան ալիքը։
Եգիպտացի լրագրողը հայտարարել է, որ իսրայելական ինքնաթիռները թռել են Սիրիայի և Իրաքի օդային տարածքով՝ առանց ՀՕՊ համակարգերի թիրախ դառնալու, և ուղեկցվել են հինգ լիցքավորող օդանավերով՝ մոտ 1800 կիլոմետր երկկողմանի թռիչք կատարելու համար։
Ադիբը հավելել է, որ Իրանին ուղղված Իսրայելի նախորդ գործողությունները, ինչպես նաև ՀԱՄԱՍ-ի նախկին քաղբյուրոյի առաջնորդ Իսմայիլ Հանիյեի դեմ մահափորձի դավադրությունը, ևս իրականացվել են Ադրբեջանի տարածքից՝ Ադրբեջանի և Իսրայելի միջև լայնածավալ հետախուզական համագործակցության շրջանակում։
Հ.Գ. Հաջորդ պատերազմում Իրանի հարվածը Ադրբեջանից ընդամենը մեկ քայլ հեռավորության վրա տեղակայված թիրախներին անխուսափելի կլինի. դա բացարձակապես անխուսափելի է։
