Թրամփը պատրաստ է լուրջ պատժшմիջոցներ կիրառել Ռուսաստանի դեմ, եթե ՆԱՏՕ-ի երկրները դադարեն ռուսական նավթ գնել
ԱՄՆ նախագահ Դոնալդ Թրամփը Truth Social սոցիալական ցանցում հայտնել է, որ նամակ է ուղարկել ՆԱՏՕ-ի երկրներին և «ամբողջ աշխարհին»՝ կոչ անելով նրանց դադարեցնել ռուսական նավթի գնումը։
Ըստ նամակի տեքստի՝ ԱՄՆ նախագահը համաձայն կլինի Ռուսաստանի դեմ «լուրջ» պատժամիջոցներ կիրառել միայն այն դեպքում, եթե ՆԱՏՕ-ի բոլոր երկրները համաձայնվեն և սկսեն անել նույնը՝ դադարեցնելով Ռուսաստանից նավթ գնելը։
«Ինչպես գիտեք, ՆԱՏՕ-ի հաղթանակի ձգտումը հեռու է եղել 100%-ից և նրանցից ոմանց կողմից ռուսական նավթի գնումը շոկային էր։ Սա զգալիորեն թուլացնում է Ռուսաստանի հետ ձեր բանակցային դիրքը և բանակցային ուժը։ Ամեն դեպքում, ես պատրաստ եմ «գնալ», երբ դուք պատրաստ լինեք։ Պարզապես ասեք՝ երբ։ Ես կարծում եմ, որ սա և ՆԱՏՕ-ի կողմից որպես խումբ Չինաստանի վրա 50-100% մաքսատուրքեր սահմանելը, որոնք ամբողջությամբ կվերացվեն Ռուսաստանի և Ուկրաինայի հետ պատերազմի ավարտից հետո, նույնպես մեծ դեր կխաղան այս մահացու, բայց անհեթեթ պատերազմի ավարտի գործում։ Չինաստանը ուժեղ վերահսկողություն և նույնիսկ իշխանություն ունի Ռուսաստանի նկատմամբ և այս հզոր մաքսատուրքերը կոչնչացնեն այդ իշխանությունը», – նամակից մեջբերել է Թրամփը։
ԱՄՆ նախագահը նաև հայտարարել է, որ դա «Բայդենի և Զելենսկու պատերազմն է»։
«Եթե ՆԱՏՕ-ն անի այն, ինչ ես եմ ասում, պատերազմը շատ արագ կավարտվի և այդ բոլոր կյանքերը կփրկվեն։ Եթե ոչ, ապա դուք պարզապես իզուր եք վատնում իմ ժամանակը, ինչպես նաև Միացյալ Նահանգների ժամանակը, էներգիան և գումարը», – նշել է Թրամփը։
