Լեհաստանը երկարաձգել է բուֆերային գոտու գործողությունը Բելառուսի հետ սահմանին
Լեհաստանի կողմից Բելառուսի հետ սահմանին ստեղծված բուֆերային գոտու գործողությունը երկարաձգվում է: Այս մասին հաղորդում է «Ինտերֆաքս»-ը՝ վկայակոչելով Լեհաստանի ներքին գործերի և վարչակազմի նախարարության մամուլի ծառայությունը։
«Ներքին գործերի և վարչակազմի նախարարը ևս երեք ամսով երկարաձգել է լեհ-բելառուսական սահմանին գտնվող բուֆերային գոտու գործողությունը…. Հրահանգներն ուժի մեջ կլինեն սեպտեմբերի 6-ից մինչև դեկտեմբերի 4-ը», – ասվում է հաղորդագրության մեջ։
«Բուֆերային գոտու պահպանումն անհրաժեշտ է Բելառուսից աճող միգրացիոն ճնշման պատճառով։ Լեհ-բելառուսական սահմանը, որի հերմետիկությունը մոտենում է 98%-ի, որոշիչ նշանակություն ունի Լեհաստանի և ամբողջ Եվրոպական միության անվտանգության համար», – հայտարարել է ներքին գործերի և վարչակազմի նախարար Մարցին Կերվինսկին, որի խոսքը մեջբերում է գերատեսչության մամուլի ծառայությունը։
Ըստ նախարարության՝ վերջին ամիսներին Բելառուսի հետ սահմանն անօրինականորեն հատելու փորձերի թիվը գրեթե կրկնապատկվել է նախորդ տարվա համեմատությամբ։ 2025 թ. հունիսից մինչև օգոստոս ընկած ժամանակահատվածում Սահմանապահ ծառայությունը գրանցել է գրեթե 13 800 նման դեպք՝ նախորդ տարվա համապատասխան ժամանակաշրջանի 7500-ի համեմատությամբ, ինչը նշանակում է 83%-ով աճ։
Դրա հետ մեկտեղ գերատեսչությունում նշել են, որ «միայն այս տարվա օգոստոսին Սահմանապահ ծառայությունը գրանցել է լեհ-բելառուսական սահմանն անօրինականորեն հատելու ավելի քան 5400 փորձ։ 2024 թ. օգոստոսին դրանք 2300-ից պակաս են եղել, ինչը նշանակում է գրեթե 2,5 անգամ աճ»։
2024 թ. հունիսի 13-ից Լեհաստանը Բելառուսի հետ սահմանին ստեղծել է բուֆերային գոտի, որը ենթադրում է սահմանամերձ գոտու որոշակի հատվածում օտարերկրացիների ներկայության ժամանակավոր արգելք։ Նաև լեհ-բելառուսական սահմանի ուժեղացման համար ուղարկվել են ռազմական ժանդարմերիայի զինծառայողներ և ոստիկանական լրացուցիչ ուժեր, ինչը լեհական կողմը հիմնավորում է «սահմանապահների և սահմանամերձ գոտում ծառայող զինվորների վրա միգրանտների հարձակումների թվի ավելացմամբ»։
Սահմանափակումներն սկզբում մտցվել են 90 օրով, հետագայում երկարաձգվել են։
