Կա՛մ խղճով դատեք, կա՛մ ասածներս հիմնավորեք, որ սխալ է, գամ, գլուխս կախեմ, ներողություն խնդրեմ, Սրբազանին էլ ասեմ՝ կներես Սրբազան, կարողություններս չներեցին. Երեմ Սարգսյանը՝ դատավոր Արմինե Մելիքսեթյանին
Երևանի ընդհանուր իրավասության քրեական դատարանում՝ դատավոր Արմինե Մելիքսեթյանի նախագահությամբ, մեկնարկել է Շիրակի թեմի առաջնորդ Միքայել արքեպիսկոպոս Աջապահյանի գործով առաջին դատական նիստը։
Նախորդ դատական նիստին Երեմ Սարգսյանը միջնորդեց Շիրակի թեմի առաջնորդարանի խուզարկությունը, Առաջնորդարանի համակարգիչն ու Միքայել սրբազանի օրագիրը ճանաչել անթույլատրելի ապացույց:
Ըստ դատավոր Մելիքսեթյանի՝ խուզարկությանը պարտադիր չէ նաև օրինական ներկայացուցչի ներկայությունը: Հիշեցնենք, որ պաշտպան Թամարա Յայլոյանին թույլ չէին տվել ներկա գտնվել Շիրակի թեմի առաջնորդարանի խուզարկությանը:
Ինչ վերաբերում է Միքայել սրբազանի օրագրի զննությանը, ըստ դատավոր Մելիքսեթյանի այն անթույլատրելի ճանաչելու՝ պաշտպանական կողմի միջնորդությունը նույնպես հիմնավոր չէ:
«Դուք ի վիճակի չեք այս գործով դատական քննություն իրականացնել…Ես խոստանում եմ, որ այս դատավարությունը լինի դասընթաց, թե ինչ չպետք է անել ու ինչպիսի նախագահող չպետք է լինի: Հանգստությամբ ապօրինություն եք անում»,-Երեմ Սարգսյանի արձագանքն էր դատավորին:
Այսօրվա դատական նիստը մեկնարկեց հանրային մեղադրողի կողմից Միքայել սրբազանի վերաբերյալ մեղադրական եզրափակիչ ելույթով: Վերջում էլ միջնորդեց Սրբազանի նկատմամբ կայացնել մեղադրական վերդիկտ:
Հաջորդիվ ճառով պետք է հանդես գար պաշտպանական կողմը: Հայտարարվեց կես ժամ ընդմիջում, որից հետո Միքայել սրբազանի պաշտպանները հանդես կգան պաշտպանական եզրափակիչ ելույթներով:
Ընդմիջումից առաջ սակայն պաշտպան Հարութ Ակլունցը միջնորդեց դատարանին թույլ տալ դատարանի բակում գտնվող շուրջ մեկ տասնյակ հոգևորականներին, որոնց մեջ նաև Շիրակի թեմի հոգևարականներն էին, ներս մտնել դատական նիստերի դահլիճ: Դատարանը բավարարեց միջնորդությունը, և հոգևորականները ներս մտան դատական նիստերի դահլիճ:
Ընդմիջումից հետո առաջինը եզրափակիչ խոսքով հանդես եկավ Միքայել սրբազանի պաշտպան Երեմ Սարգսյանը:
«Առանց կոչի առկայության հանրային մեղադրողները միջնորդեցին մեղավոր ճանաչել Հայ առաքելական եկեղեցու բարձրաստիճան հոգևորական Միքայել արքեպիսկոպոս Աջապահյանին: Ու նախագահհող դատավորին այլ բան չի մնում, քան մեղավոր ճանաչել նրան:
Իսկ իրականում նախագահող դատավորն ուներ և ունի այլ ելք, սակյն իր վախերի պատճառով ի վիճակի չէ օգտվել դրանից, նախընտրում է խախտել օրենքը, օրենքի ու իրավաբանության հետ որևէ աղերս չունեցող փաստարկներով մերժել պաշտպանական կողմի բոլոր միջնորդությունները: Կյանքը ցույց տվեց, որ Ձեր պատկերացրած արդարադատությունը գործող իշխանության կամքը հլու-հնազանդ կատարելն է»,-ասաց Երեմ Սարգսյանը:
Դատավոր Արմինե Մելիքսեթյանը երկար չդիմացավ, ընդհատեց Երեմ Սարգսյանին՝ ասելով՝ «Ձեր ելույթն իմ վախերի մասին չէ», ինչին պաշտպանն արձագանքեց՝ Դուք իրավունք չունեք սահմանափակել իմ խոսքը»:
Շարունակելով՝ Երեմ Սարգսյանը նշեց՝ նախագահող դատավորը դատաքննության ողջ ընթացքում հանդես է եկել որպես 3-րդ մեղադրող դատախազ`նրան հիշեցնելով բացարձակ անարդար դատական ակտ կայացնելու համար նախատեսված քրեական պատասխանատվության մասին:
Երեմ Սարգսյանի ծավալուն ելույթը ներառում էր այս գործով մի քանի խումբ խախտումների մասին տեղեկատվություն: Պաշտպանը դրանց հիման վրա միջնորդեց հռչակել Միքայել արքեպիսկոպոս Աջապահյանի անմեղությունը:
«Հարցեր են՝ ինչի՞ Միքայել սրբազանի ասածը մինչև 2025թ. հունիսը հանցագործություն չէր, մեկ էլ հանկարծ հունիսի 4-ից սկսած՝ պրոցեսները զարգանում են, ու դառնում է հանցագործություն, որովհետև Միքայել սրբազանի նկատմամբ իրականացվում է քաղաքական հետապնդում: Էդ ո՞նց հենց էդ ժամանակ դատախազության հանրային կապերի բաժինը որոշեց Միքայել սրբազանի հարցազրույցներն ուղարկել ուսումնասիրության:
Անկեղծ եմ ասում, պատվարժան դատարան, հորդորում եմ ձեզ, խղճով դատել: Կարողացեք հիմնավոր կերպով ասածներս հիմնավորել, որ սխալ է, գամ, գլուխս կախեմ, ներողություն խնդրեմ, Սրբազանին էլ ասեմ՝ կներես Սրբազան, կարողություններս չներեցին»,-ասաց Երեմ Սարգսյանը՝ կրկին միջնորդելով հռչակել Միքայել սրբազանի անմեղությունը:
Աշխատանքային օրվա ավարտով պայմանավորված՝ դատական նիստը հետաձգվեց: Հաջորդ նիստը տեղի կունենա սեպտեմբերի 2-ին՝ ժամը 12.00-ին:
Հիշեցնենք` ըստ «Դատալեքս» դատական-տեղեկատվական համակարգի՝ Միքայել արքեպիսկոպոս Աջապահյանին մեղադրանք է առաջադրվել «այն բանի համար, որ նա, ունենալով արքեպիսկոպոսի հոգևոր աստիճան և հանդիսանալով Հայ Առաքելական Սուրբ Եկեղեցու Շիրակի թեմի առաջնորդը, պարբերաբար հրապարակային ելույթներով հանդես գալով զանգվածային լրատվության միջոցներով, ունենալով մեծ թվով հետևորդներ, հետևաբար, նաև իր խոսքով հասարակության անդամների վարքագիծն ուղղորդելու զգալի հնարավորություն, համաձայն չլինելով ներքին և արտաքին քաղաքականության հետ կապված հարցերի վերաբերյալ ՀՀ կառավարության դիրքորոշումների հետ, օգտագործելով զանգվածային լրատվության միջոցները, տեղեկատվական ու հաղորդակցական տեխնոլոգիաները՝ նախ՝ 2024 թվականի փետրվարի 3-ին, ապա նաև՝ 2025 թվականի հունիսի 21-ին զանգվածային լրատվության միջոցների ներկայացուցիչներին տրված հարցազրույցների ընթացքում հնչեցրել է իշխանությունը զավթելուն ուղղված հրապարակային կոչեր»։
«Քանի անգամ ասացի բացեիբաց՝ ռազմական հեղաշրջում ա պետք, պատերազմի օրերին ասացի և նախագահներին ասաի՝ Քոչարյանին և Սերժին: Ասացի՝ լավ, Դո՛ւք, պարոն նախագահ Քոչարյան, տասը տարի նախագահ եք եղել, դրանից առաջ մի տարի-երկու տարի էլ վարչապետ, չէ՞, էդքան տարի էլ Ղարաբաղի նախագահ, Դուք Ձեր կողմնակից, գաղափարակից ոչ մի գեներալ չունե՞ք, ո՛չ բանակում, ո՛չ ոստիկանությունում, ո՛չ ազգային անվտանգությունում, որ գան Ձեր կողքը կանգնեն և հեղաշրջում իրականացնեն։ Եթե իրենցով է։ Սե՛րժ, դու ավելի՝ տասը տարի նախագահ, վարչապետ, պաշտպանության նախարար, ներքին գործերի նախարար, ազգային անվտանգության նախարար, ազգային անվտանգության քարտուղար, էլ պաշտոն կա՞, որ չես տարել, հա, Շախմատի ֆեդերացիայի նախագահ։ Դու ոչ մի գեներալ քեզ նվիրված չունե՞ս, ո՛չ ոստիկանությունում, ո՛չ ազգային անվտանգությունում, ո՛չ բանակում, որ հելել ես փողոց պատիվ ունեմ-մատիվ ունեմ։ Ռեալ պոլիտիկը ինչի՞ մասին էր խոսում, էդ ռեալ պոլիտիկն է, չէ՞, որ ընտրությունով չի, հնարավոր չի սա փոխել։ Ո՞ւր եք գնացել ընտրության, ո՞ւր եք մտել ընտրության։ Նշանակում է՝ ձեր նպատակը փոխելը չի։ Բա ձեզանից լավ ո՞վ պիտի իմանա, որ սա ընտրությամբ չի փոխվի…»,- 2024 թվականին Gala TV-իի տեսագրության մեջ ասել էր նա։
Ի դեպ, մինչ այդ՝ 2020, 2023 թվականներին ևս Միքայել արքեպիսկոպոսը նույնատիպ հայտարարություններ էր արել, սակայն դրանց համար նրա նկատմամբ քրեական հետապնդում չի հարուցվել։ Ավելին` 2023 թվականին արված հայտարարությունից հետո «Իրազեկ քաղաքացիների միավորում» հասարակական կազմակերպությունը հանցագործության մասին հաղորդում էր ներկայացրել Դատախազություն, սակայն վարույթ չի նախաձեռնվել։ Եվ միայն այն բանից հետո, երբ Նիկոլ Փաշինյանը հունիսի սկզբին սկսեց իր հրապարակային խոսքում թիրախավորել հոգևորականներին, իրավապահները հիշեցին Աջապահյանի՝ ավելի քան մեկ տարի առաջ հայտարարությունը, ու վարույթ նախաձեռնվեց։
Մանրամասները՝ տեսանյութում:
