Բաքուն պատասխանատվություն չի կրում Մոսկվայի հետ հարաբերությունների վատթարացման համար. Ալիև
Ադրբեջանի նախագահ Իլհամ Ալիևը կարծում է, որ իր երկիրը պատասխանատվություն չի կրում Ռուսաստանի հետ հարաբերությունների վատթարացման համար: Նրա խոսքերը մեջբերում է ՌԻԱ Նովոստին։
«Ադրբեջանը պատասխանատվություն չի կրում Ռուսաստանի հետ հարաբերությունների վատթարացման համար և երբեք չի հանդուրժի ագրեսիայի կամ անհարգալից վերաբերմունքի դրսևորումներ»,-հայտարարել է Ալիևը «Ալ Արաբիա» հեռուստաալիքին տված հարցազրույցում։
Խոսելով հունիսին Եկատերինբուրգում հանցավոր խմբի անդամների ձերբակալությունների մասին՝ Ադրբեջանի նախագահն այդ պատմությունը որակել է որպես «Ռուսաստանում ադրբեջանցիների վրա անհիմն հարձակումներ»: Նա նաև կարծիք է հայտնել, որ Բաքուն «պատասխանում է կառուցողական և օրինական»:
2025 թվականի հունիսի վերջին Ռուսաստանի քննչական կոմիտեի Սվերդլովսկի շրջանի քննչական վարչությունը հայտնել էր Եկատերինբուրգում նախորդ տարիների սպանությունների գործով հանցավոր խմբի անդամների ձերբակալության մասին։ Հետաքննության վարկածով՝ մեղադրյալները, որոնք «էթնիկ հանցավոր խմբի մաս են կազմում», ներգրավված են 2001, 2010, 2011 թվականներին կատարված սպանությունների և մահափորձերի մի շարք դրվագներում:
Դատարանը կալանավորել է գործով ութ մեղադրյալի։ ՌԴ ԱԳՆ պաշտոնական ներկայացուցիչ Մարիա Զախարովան հայտարարել է, որ իրավիճակն իրավապահ մարմինների վերահսկողության տակ է: Նրա խոսքով՝ կասկածյալները «Ռուսաստանի քաղաքացիներ են, ծագումով Ադրբեջանից»։
