«Մենք թևակոխում ենք հիմարների դարաշրջան». Անդրեյ Կոնչալովսկի
88-ամյա ռեժիսոր Անդրեյ Կոնչալովսկին իր դստեր՝ Նատալյա Կոնչալովսկայայի հետ հարցազրույցում բողոքել է եվրոպացիների մտավոր կարողությունների անմխիթար վիճակից։ Ռեժիսորի խոսքով՝ մեծ եվրոպական մշակույթը, որին 20 և 30 տարեկան ռուսների սերունդները դեռևս ապավինում են, վաղուց իրեն սպառել է Ամերիկայի շնորհիվ։
«20-րդ դարը ամերիկանացման, եվրոպական մշակույթի ոչնչացման դար էր։ Պատերազմի ավարտին Ամերիկան դարձել էր համաշխարհային տերություն։ Ամերիկան թելադրում էր քաղաքական, սոցիալական և ցանկացած այլ իմաստ, և սա հանգեցրեց մշակույթի սպառմանը… Մենք այս ազդեցության տակ ընկնելու եզրին ենք։ Հատկապես այն պատճառով, որ համացանցն ամբողջությամբ զավթել է մարդուն… Հիմա մարդը սովորելու կարիք չունի, նա կարող է ամեն ինչ որոնել։ Մարդը չի հիշում իր ծնողների հեռախոսահամարը։ Տեղի է ունենում հիշողության էրոզիա։ Հիշողության կորուստը հանգեցնում է տեղի ունեցողի ընկալման բացակայությանը։ Սա հատկապես նկատելի է արևմտյան քաղաքական գործիչների մոտ։ Մտավոր և ճանաչողական կարողությունները վախեցնում են իրենց ցածր մակարդակով։
Եթե համեմատեք 30 տարի առաջվա Ֆրանսիայի նախագահներին՝ նրանք հսկաներ էին։ Ժիսկարը, Միտերանը… Նրանք մտածողներ էին։ Եվ այսօր… Ես ոչ մեկին չեմ մեղադրում, սա օբյեկտիվ իրականություն է։ Սա նշանակում է, որ մարդու ուղեղի ճանաչողական կարողությունները արագորեն նվազում են։ Ինչպես ասում էր Սերգեյ Կապիցան՝ մենք թևակոխում ենք հիմարների դարաշրջան։ Սա ակնհայտ է քաղաքականության մեջ։ Տխուր է»:
