Ակնկալիք չկա. Նիկոլ Փաշինյանին ուղղված նախորդ նամակին պատասխանել են, որ անհետ կորած տղաների հարցով ԱԱԾ-ն է զբաղվում. Անհետ կորածի հայր
2023 թվականի սեպտեմբերին Արցախի բռնի հայաթափումից հետո բազմաթիվ արցախահայեր ՀՀ կառավարության ղեկավարից պահանջում են, որպեսզի 2023 թվականի սեպտեմբերի 19-20-ն Ադրբեջանի ագրեսիայի հետևանքով զոհված և Արցախում հուղարկավորված անձանց արտաշիրմում իրականացնեն և տեղափոխեն Հայաստան՝ այստեղ վերահուղարկավորելու համար։
Արցախահայերի մի մասն էլ պահանջում է, որպեսզի 2023 թվականի սեպտեմբերի 25-ին Ստեփանակերտ-Ասկերան ճանապարհին տեղի ունեցած բենզինի պայթյունի հետևանքով անհետ կորած անձանց վերաբերյալ որևէ տեղեկատվություն փոխանցեն։
Օրերս արցախահայերը կրկին հավաքվել էին Կառավարության մոտ, այս անգամ կրկին Նիկոլ Փաշինյանը նրանց չի ընդունել, նրանք կարողացել են Նիկոլ Փաշինյանին միայն նամակ փոխանցել՝ իրենց խնդրի վերաբերյալ։
«Մենք Նիկոլ Փաշինյանին նամակ ենք փոխանցել ու սպասում ենք պատասխանի, 5 օրվա ընթացքում պետք է պատասխանի։
Կառավարության շենքի մոտ էինք գնացել արտաշիրմման ու անհետ կորած տղաների հարցով, մեզանից որևէ մեկին Նիկոլ Փաշինյանը չի ընդունել, մարդիկ մոտեցել են, իրենց խնդիրների մասով միայն նամակ են փոխանցել։ Նախկինում մենք ևս այս թեմայով նամակ փոխանցել էինք Փաշինյանին, մեզ պատասխանել են, որ հարցով զբաղվում է Ազգային անվտանգության ծառայությունը, ու մենք այդ նամակը ստացել ենք ԱԱԾ-ից»,- 168.am-ի հետ զրույցում նշեց Արցախում անհետ կորած տղաներից մեկի հայրը։
Օգոստոսի 8-ին Վաշինգտոնում նախաստորագրված «Խաղաղության պայմանագրից» Արցախում զոհված և անհետ կորած անձանց հարազատները, այդ թվում՝ մեր զրուցակիցը, որևէ դրական ակնկալիք չունեն։
«Անձամբ ինքս որևէ ակնկալիք չունեմ, այս վերջին 2 տարվա ընթացքում շատ մարդկանց հետ ենք հանդիպել, սակայն որևէ հանդիպման ժամանակ չեն խոսել այն մասին, որ բանակցողը Նիկոլ Փաշինյանն է»,- շեշտեց մեր զրուցակիցը՝ հավելելով, որ բոլորն էլ այս պահին սպասում են իրենց նամակի պատասխանին։
Նշենք, որ արցախահայերը բազմիցս բողոքի ակցիաներ են իրականացրել Կառավարության շենքի մոտ, սակայն նրանց որևէ մեկը չի ընդունել, այդ թվում՝ Նիկոլ Փաշինյանը։
Հիշեցնենք, որ 2023 թվականի հոկտեմբերի վերջին Քննչական կոմիտեի տարածած հաղորդագրության համաձայն, սեպտեմբերի 19-ի ռազմական երկօրյա գործողությունների ընթացքում արձանագրվել են հայ զինծառայողների, քաղաքացիական անձանց դիտավորությամբ, դաժանաբար մահ պատճառելու, նրանց նկատմամբ բռնություններ գործադրելու, խոշտանգման ենթարկելու, նրանց նկատմամբ անմարդկային, արժանապատվությունը նվաստացնող վերաբերմունք դրսևորելու, ինչպես նաև՝ զինծառայողների, քաղաքացիական անձանց դիերը խոշտանգելու, անարգելու ռազմական հանցագործությունների դեպքեր։
«Նախաքննության ընթացքում ձեռք բերված փաստական տվյալների համաձայն՝ ռազմական ագրեսիայի հետևանքով Լեռնային Ղարաբաղում զոհվել է 200-ից ավելի զինծառայող և քաղաքացիական անձ։
Շուրջ 12 քաղաքացիական անձ և 30 զինծառայող համարվում է անհետ կորած: Առկա է առնվազն 14 անձի խոշտանգման ենթարկելու դեպք, որոնցից 12-ը զինծառայող է, 2-ը՝ քաղաքացիական անձ։ Ռազմական գործողությունների հետևանքով սպանվել է 3 երեխա, տարբեր աստիճանի մարմնական վնասվածքներ է ստացել 231 զինծառայող եւ 80 քաղաքացիական անձ:
Բռնի տեղահանության ընթացքում և դրան անմիջապես հաջորդող ժամանակահատվածում արձանագրվել է 64 քաղաքացիական անձի մահ»,- փոխանցել էր Քննչական կոմիտեն:
