Սյունիքում կաթնամթերքի արտադրամասի արտադրական գործունեության առանձին գործառույթները կասեցվել են
ՀՀ սննդամթերքի անվտանգության տեսչական մարմնի Երևանի կենտրոնի տեսուչները վերահսկողական միջոցառումներ են իրականացրել Սյունիքի մարզի Բռնակոթ գյուղում գործունեություն իրականացնող անհատ ձեռնարկատեր Մանվել Ամիրխանյանին պատկանող կաթնամթերքի արտադրամասում, որտեղ կատարել են ապրանքատեսակների նմուշառում և հանձնել լաբորատոր փորձաքննության։
Ինչպես տեղեկանում ենք ՀՀ սննդամթերքի անվտանգության տեսչական մարմնի տարածած հաղորդագրությունից, ըստ լաբորատոր փորձաքննության արդյունքների պանիր «Լոռի», պանիր «Չանախ» և «Մածուն» արտադրատեսակները չեն համապատասխանել տեխնիկական կանոնակարգով սահմանված պահանջներին։ Մարսնավորապես՝ պանիր «Լոռի» և պանիր «Չանախ» (արտ․՝ 14․08․2025) արտադրատեսակները եղել են ԱՑԽՄ (աղիքային ցուպիկի խմբի մանրէներ) ցուցանիշով, 1 կգ-անոց «Մածուն» (արտ․՝ 14․08․2025) արտադրատեսակը՝ բորբոսասնկեր ցուցանիշով։
Տեսչական մարմնից վստահեցնում են, որ արտադրողին տրվել է խմբաքանակների իրացումն արգելելու, շուկայից հետ կանչելու, ոչնչացնելու կամ օգտահանելու մասին կարգադրագիր, հանձնարարվել է ապահովել արտադրանքի համապատասխանությունը գործող տեխնիկական կանոնակարգերին:
