Այն, ինչ պատկերացնում էի, նոյեմբերի 9-ի համաձայնագրում էր. Տոնոյանը` «Թրամփի ուղու» մասին
ՀՀ պաշտպանության նախկին նախարար Դավիթ Տոնոյանը հայտարարել է, որ Հայաստանի անվտանգության ապահովման տեսանկյունից չէր պատկերացնում, որ խոսք կլինի «Թրամփի ուղու» մասին, քանի որ իր բոլոր պատկերացումներն արտացոլված էին նոյեմբերի 9-ի եռակողմ հռչակագրում։ Այս մասին նա ասել է հերթական դատական նիստից հետո news.am-ի հետ զրույցում:
«Արցախի հայաթափումը, Լաչինի ճանապարհի կորուստը հիմա այլ իրավիճակ են ստեղծել, և, դրանից ելնելով, այսօրվա իշխանություններն այդպիսի համաձայնությունների են գալիս»,- ասաց Տոնոյանը։
Նրա խոսքով` բոլոր դեկլարատիվ հայտարարությունները, որ եղել են Վաշինգտոնի հռչակագրից հետո, դրանց այս պահին հնարավոր չէ գնահատական տալ, քանի որ անվտանգության ապահովման հետ կապված փոփոխություններ, որպես այդպիսին չեն կատարվել, գետնի վրա ոչ մի բան չի իրականացվել։
Տոնոյանը շեշտեց, որ անվտանգության տեսանկյունից չի տեսնում դեռ այնպիսի բան, որի վրա կարելի է ուրախանալ, դա ներկայացնել որպես հաջողություն։
«Կարևոր է, թե «Թրամփի ուղին» ինչ նախագիծ է լինելու, որ երկրներն են մասնակցելու, ինչ ներդրումներ են կատարվելու, որից հետո հնարավոր կլինի ենթադրություն անել։ Դեռ պարզ չէ, թե դա աշխարհագրորեն որտեղով է անցնելու` Մեղրիով, երկաթգծո՞վ, թե՞ այլ տեղով»,- ասաց նա։
Հարցին, թե ինքը հավատո՞ւմ է Փաշինյանի խաղաղության դարաշրջանին, Տոնոյանը պատասխանեց.
«Ես ո՛չ հավատալու, ո՛չ չհավատալու խնդիր չունեմ։ Այն, ինչ ինձ հետ կատարվել է, ես որևէ մեկին այդ իշխանությունում հավատալու չունեմ»,- ասաց նա։
Անդրադառնալով իր գործին` Տոնոյանը հավելեց, որ իր նկատմամբ թավշյա հետապնդումը շարունակվում է։
