Ալյասկայի երկինքը կփակեն Պուտինի հետ Թրամփի հանդիպման օրը
Օգոստոսի 15-ին կփակվի Ալյասկայի Անքորիջ քաղաքի օդային տարածությունը։ Անքորիջում է կայանալու ԱՄՆ-ի և Ռուսաստանի նախագահներ Դոնալդ Թրամփի և Վլադիմիր Պուտինի հանդիպումը: Այս մասին հաղորդել է ԱՄՆ քաղաքացիական ավիացիայի դաշնային վարչությունը (FAA):
Գերատեսչությունը հրապարակել է «VIP-անձի տեղաշարժի մասին ծանուցում»: Դրանում նշվում է, որ երկինքը փակ կլինի 30 մղոն (48,3 կմ) շառավղով: Սահմանափակումները կվերաբերեն մինչև 18 000 ոտնաչափ (5,5 կմ) բարձրությանը և կհանվեն օգոստոսի 16-ին:
Թրամփ-Պուտին հանդիպման օրակարգում ռուս-ուկրաինական հակամարտության կարգավորումն է։ ԱՄՆ նախագահը հայտարարել է, որ Ուկրաինայի ղեկավարը չի մասնակցի Ալյասկայում կայանալիք հանդիպմանը։
