Աշխարհի ամենամեծ մարջանային խութը ռեկորդային չափով փոքրացել է
Ավստրալիայի Մեծ արգելախութը վերջին տարվա ընթացքում ենթարկվել է մարջանների ծածկույթի խոշորագույն կրճատման դրա երեք հիմնական շրջաններից երկուսում: Այս մասին հաղորդում է Reuters-ը՝ վկայակոչելով Ավստրալիայի ծովային գիտությունների ինստիտուտի (AIMS) գիտնականներին:
Մասնագետների տվյալներով՝ վերջին տարվա ընթացքում խութը կորցրել է իր մարջանային ծածկույթի մինչև մեկ երրորդը, ինչն ամենամեծ ցուցանիշն է 39 տարի առաջ դիտարկումների սկսվելուց ի վեր:
Դրա պատճառ է դարձել մարջանների զանգվածային գունազրկումը. խութի մեծ հատվածներ սպիտակել են բարձր ջերմաստիճանի պատճառով՝ դրանք վերացման մեծ վտանգի տակ դնելով։
Գիտնականները վերջին 40 տարվա ընթացքում զբաղվում են Մեծ արգելախութի վիճակի մանրամասն դիտազննմամբ: Վերջին 15 տարիներին մասնագետները նշում են մարջանների գունազրկման հաճախականության մեծացման բացասական միտումը, ինչը վկայում է այդ եզակի էկոհամակարգի վրա մեծ ճնշման մասին: Մասնավորապես, 2016 թվականից ի վեր գիտնականները գրանցել են զանգվածային գունազրկման հինգ ալիք:
Մեծ արգելախութն աշխարհի խոշորագույն մարջանային խութն է, որը բաղկացած է ավելի քան 2900 առանձին մարջանային կուտակումներից: Մարջանային գաղութները ձգվում են 2400 կմ Ավստրալիայի հյուսիս-արևելյան ափի երկայնքով, դրա ընդհանուր մակերեսը կազմում է մոտ 344 000 քառակուսի կիլոմետր: 1981 թվականին Մեծ արգելախութն ընդգրկվել է ՅՈՒՆԵՍԿՕ-ի Համաշխարհային ժառանգության օբյեկտների ցանկում:
