Գազայում սովից մահացածների թիվը հասել է 115-ի
Սովի և թերսնուցման պատճառով մահացած պաղեստինցիների թիվը հասել է 115-ի, հայտնել է Գազայի կառավարության մամուլի գրասենյակը։ Այս մասին հաղորդում է Al Jazeera հեռուստաալիքը։Իսկ Գազայի հատվածի բժշկական աղբյուրները հայտնել են, որ հուլիսի 24-ի լուսաբացից ի վեր պաղեստինյան անկլավում իսրայելական ուժերի կողմից սպանվել է 21 պաղեստինցի, որոնցից 7-ը՝ սննդի բաշխման կենտրոնների մոտակայքում։
Պաղեստինում ՅՈՒՆԻՍԵՖ-ի ներկայացուցիչն Al Jazeera-ին հայտնել է, որ Գազայում երեխաները մահվան լուրջ վտանգի տակ են՝ հավելելով, որ այն, ինչ տեղի է ունենում, աննախադեպ է։ Նա Գազայում իրավիճակը բնութագրել է որպես չափազանց ցավալի։
Իսրայելական լրատվամիջոցները հաղորդել են, որ ԱՄՆ նախագահի բանագնաց Սթիվ Ուիթքոֆը ժամանել է Իտալիա՝ Գազայում հրադադարի բանակցությունները քննարկելու համար։
Ավելի վաղ տեղեկություններ էին ստացվել, որ իսրայելական կողմը միջնորդների միջոցով ստացել է պաղեստինյան ՀԱՄԱՍ շարժման պատասխանը՝ Գազայի հատվածում հնարավոր հրադադարի շուրջ հետագա բանակցությունների վերաբերյալ: Իսրայելի վարչապետ Բենիամին Նեթանյահուի գրասենյակը հայտարարել էր, որ Իսրայելն ուսումնասիրում է ՀԱՄԱՍ-ի արձագանքը Գազայում հրադադարի առաջարկին։
Գազայի առողջապահության նախարարությունը տեղեկացրել է, որ 2023 թ. հոկտեմբերի 7-ից վեր իսրայելական հարձակումների հետևանքով զոհված պաղեստինցիների թիվը հասել է 59 219-ի, վիրավորվել է 143 045 մարդ, որոնց շարքում զգալի թիվ են կազմում կանայք և երեխաները։
Իսրայելը Գազայի հատվածում ռազմական գործողություններ էր սկսել՝ ի պատասխան պաղեստինյան ՀԱՄԱՍ շարժման զինյալների ներխուժման, որի հետևանքով զոհվել էր գրեթե 1200 մարդ, գերեվարվել՝ շուրջ 250 մարդ։
