«Արմենիան Քարդ»-ն անդրադարձել է Arca վճարային համակարգում տեղի ունեցած խափանմանը
«Արմենիան Քարդ» ընկերությունն անդրադարձել է Arca վճարային համակարգում տեղի ունեցած խափանմանը: Ընկերության տարածած պարզաբանման մեջ ընդգծվում է, որ տեխնիկական թիմն աշխատում է համակարգի բնականոն աշխատանքը վերագործարկելու և բոլոր ծառայությունների անխափան հասանելիությունը վերականգնելու ուղղությամբ։
«Այսօր՝ 23․07․2025, առավոտյան 10։10-ից տեխնիկական խնդիրների պատճառով խաթարվել է Arca վճարային համակարգի բնականոն աշխատանքը, ինչի հետևանքով հնարավոր չի եղել կատարել որոշ քարտային գործարքներ:
Ժամը 12։45-ի դրությամբ համակարգի աշխատանքը վերականգնվել է և այս պահին խնդիրն առկա է միայն բանկերի հավելվածներում և քարտից քարտ փոխանցումներում։
Մեր տեխնիկական թիմն ամբողջ ներուժով աշխատում է՝ համակարգի բնականոն աշխատանքը հնարավորինս արագ վերագործարկելու և բոլոր ծառայությունների անխափան հասանելիությունը վերականգնելու ուղղությամբ։Խորապես ցավում ենք պատճառված անհարմարությունների համար և լիարժեք գիտակցում ենք իրավիճակի լրջությունը»,- ասված է ընկերության տարածած հաղորդագրության մեջ:
Նշենք, որ վաղ առավոտից քաղաքացիներն ահազանգում են, որ բանկոմատներից չի ստացվում գումար կանխիկացնել, բջջային հավելվածները չեն գործում, քարտային գնումներ նույնպես անհնար է իրականացնել:
Այս պահի դրությամբ խնդիրը դեռևս ամբողջությամբ լուծված չէ:
