Թրամփը հայտարարել է, որ Patriot ՀՕՊ համակարգերն արդեն մատակարարվում են Ուկրաինա
ԱՄՆ նախագահ Դոնալդ Թրամփը հայտարարել է, որ Գերմանիան արդեն իսկ Կիևին մատակարարում է Patriot զենիթահրթիռային համակարգեր։ Այս մասին նա ասել է Փենսիլվանիայից վերադառնալուց հետո լրագրողների հետ զրույցում, որի տեսանյութը տարածել է LiveNow from FOX-ը։
«Դրանք արդեն մատակարարվում են։ Դրանք գալիս են Գերմանիայից, ապա փոխարինվում են Գերմանիայում», – ասել է նա լրագրողներին։
Թրամփը հավելել է, որ Վաշինգտոնում ՆԱՏՕ-ի գլխավոր քարտուղար Մարկ Ռյուտեի հետ հանդիպման ժամանակ կնքված պայմանավորվածությունների համաձայն՝ «բոլոր դեպքերում Միացյալ Նահանգները կստանա ամբողջական փոխհատուցում»։
Վճարումները կկատարվեն կա՛մ ՆԱՏՕ-ի միջոցով, կա՛մ անմիջապես ԵՄ անդամ պետությունների կողմից, և ԱՄՆ-ն «պարտավոր չի լինի որևէ ներդրում կատարել, մենք մեր գումարը ամբողջությամբ կվերադարձնենք»։
Միևնույն ժամանակ, Թրամփը կրկին ասել է, որ «հիանալի կլինի» Ուկրաինայի հարցով խաղաղության համաձայնագրի հասնելը։
