Արտահերթ ընտրություններ կանցկացնեն՝ խոշորացված համայնքներն էլ ավելի խոշորացնելու համար

Նիկոլ Փաշինյանի ղեկավարած Կառավարությունը 2026 թվականի ընտրություններին ընդառաջ գնում է քաղաքական նպատակահարմարությամբ պայմանավորված համայնքների խոշորացման՝ խոշորացնելով արդեն իսկ խոշորացված համայնքները։

Խոսքն այս դեպքում Արմավիրի մարզի Վաղարշապատ համայնքի մասին է։ Այս համայնքը մնացել է առանց ղեկավարի՝ Դիանա Գասպարյանի հրաժարականից հետո, ինչից հետո օրենքով սահմանված կարգով երկշաբաթյա ժամկետում Վաղարշապատի ավագանին պետք է ընտրեր համայնքի նոր ղեկավար, բայց չընտրեց։

Ավագանու կողմից երկու շաբաթվա ընթացքում համայնքի նոր ղեկավար չընտրելու դեպքում ավագանու լիազորությունները դադարեցվում են և նշանակվում է ավագանու արտահերթ ընտրություն։

Հենց այդ որոշումն էլ Կառավարությունն ընդունել է այսօր, և Վաղարշապատ համայնքն էլ ավելի կխոշորացվի։

Թե որքան է արժենալու քաղաքական նպատակադրությամբ պայմանավորված արտահերթ ընտրությունը 2025 թվականի պետական բյուջեի վրա, Կառավարության ընդունած որոշման մեջ նշված չէ՝ համապատասխան տվյալների բացակայության պատճառով։