Թրամփը հայտնել է ԱՄՆ պղնձի ներմուծման 50% մաքսատուրքի սահմանման մասին
ԱՄՆ նախագահ Դոնալդ Թրամփը հայտարարել է Միացյալ Նահանգներ պղնձի ներմուծման 50-տոկոսանոց մաքսատուրք սահմանելու մասին:
Այս մասին նախագահը գրել է Truth Social սոցցանցի իր էջում:
«Ստանալով մեր ազգային անվտանգության հանգամանալից գնահատականը՝ ես հայտարարում եմ 2025 թվականի օգոստոսի 1-ից պղնձի 50% մաքսատուրքի սահմանման մասին», – ասել է Թրամփը:
Նախագահի խոսքով՝ պղինձն ԱՄՆ-ին անհրաժեշտ է՝ կիսահաղորդիչների, ինքնաթիռների, նավերի, զինամթերքի, կուտակիչների, ռադարային համակարգերի, հակահրթիռային պաշտպանության համակարգերի, հիպերձայնային զենքի արտադրության և տվյալների մշակման կենտրոնների կառուցման բնագավառում:
«Պղինձը Պաշտպանության նախարարության կողմից երկրորդ առավել շատ օգտագործվող նյութերից է», – ընդգծել է ԱՄՆ-ի ղեկավարը:
Նրա խոսքով՝ պղնձի ներմուծման մաքսատուրքերի սահմանումը կուղղի այն սխալները, որոնք թույլ են տրվել նախկին նախագահ Ջո Բայդենի նախորդ վարչակազմի կողմից:
