Սանկտ Պետերբուրգում ադրբեջանցի գործարար է ձերբակալվել
Սանկտ Պետերբուրգում շինարարական ընկերության 32-ամյա գործադիր տնօրենը ձերբակալվել է ավելի քան 46 միլիոն ռուբլու ընդհանուր գումարի խարդախություններ իրականացնելու կասկածանքով: Այս մասին РБК-ին հայտնել են Ռուսաստանի ՆԳՆ Սանկտ Պետերբուրգի և Լենինգրադի մարզի մամուլի ծառայությունից։
Ըստ տեղեկության՝ հարուցվել է քրեական գործ ՌԴ քրեական օրենսգրքի 159-րդ հոդվածով (խարդախություն)։
«Ոստիկանության տվյալներով՝ կասկածյալը բնակելի շենքերի շինարարության և դրանց հետագա վարձակալության համար ներդրումներ ներգրավելու պատրվակով խարդախությամբ տիրացել է Սանկտ Պետերբուրգի երեք բնակիչների միջոցներին», – նշել են ՌԴ ՆԳՆ-ից։
Ինչպես նշում է 78.ru պորտալը, ձերբակալվածը ծնունդով Ադրբեջանից է։ Նրա տանը անվտանգության ուժերը հայտնաբերել են 175 հազար ռուբլի և 500 դոլար։ Պորտալի տվյալներով՝ ձերբակալվածը ղեկավարում է «Ամուրով Գրուպ» ՍՊԸ-ն, իսկ քրեական գործը ներառում է Սանկտ Պետերբուրգի ձեռնարկատերերին 9,6 միլիոն և 22 միլիոն ռուբլու չափով խաբելու երկու դրվագ։
Երրորդ դեպքում, գործի նյութերի համաձայն, շինարարական ընկերության գործադիր տնօրենը տուժողին խաբել է 14,7 միլիոն ռուբլու չափով: Գործարարը ձերբակալվել է Պարգոլովո գյուղի Վոլոգոդսկայա փողոցում գտնվող իր մասնավոր տանը:
Խուզարկության ընթացքում անվտանգության աշխատակիցները առգրավել են գույքի փաստաթղթեր, բջջային հեռախոս և գումար (ռուբլով և արտարժույթով): Ձերբակալվածին վերագրվող հանցագործությունները վերաբերում են 2020-2021 թվականներին ընկած ժամանակահատվածին։
